Tunisia-in an coach an ban

World Cup khelh mekah Tunisia chuan match khat chauh an khelh hnuin an coach Sabri Lamouchi an ban a, a aiawh turin Morocco leh Saudi Arabia manger hlui Herve Renard an la lut nghal.

Tunisia hian kumin January-a AFCON- aṭanga an tlak hnu khan Lamouchi hi an la lut a, match nga chiah enkawl hmanin vawi khat chiah hnehna a chanpui a, Thawhṭanni zinga Sweden 5-1 a an hneh loh hnu lawk khan ban a ni zui.

Lamouchi hi World Cup match khat chiah enkawl hnua an ban hmasak ber a ni. 2018 khan inelna ṭan nan ni hnih chauh a awm tawh tihah Spain chuan Julen Lopetegui an lo ban tawh a, tun ṭuma Qatar enkawltu hian ban a tawh chhan chu Real Madrid enkawl tura contract a ziah vang a ni. Kum 1998 khan South Korea leh Tunisia vek hian an coach te chu match hnih hnuah an ban tawh bawk.

Tunisia hi group F mawngphahah an awm mek a, enkawltu thar Renard hnuaiah group stage paltlang an tum dawn. June 21, Pathianni zing dar 9:30-ah Japan an hmachhawn dawn a, an chak lo leh a nih chuan an match hnuhnung berah, pathumna tal nih phâk tumin chak ngei ngei a ngai tawh dawn.