January transfer boruak a sang dawn em?

Football fan-te'n an nghahlelh em em chu transfer hun hi a ni a, nipui leh thlasik bazar hun a inhawn tawh chuan thuthang mak tak tak a leng a, awih chin pawh neih a ngai. Kumin January transfer-ah pawh thuthang ngaihnawm tak tak a awm a, amaherawhchu thil thleng thei tak tak tur thlir chuan thla 12 liam ta a boruak a phak a rinawm loh.

January transfer-a thawm la ring ber ang hiala ngaih theh chuan Christian Pulisic-a'n Chelsea a zawm hi a ni a, chutihrualin American midfielder hian a khelh mekna Borussia Dortmund-ah tun season chhung loan hmanga a awm chhunzawm avangin han sawi zui chiam a rem lo. Season liam taa Liverpool leh RB Leipzig ten Naby Keita chungchanga inremna an siam nen a danglam tam lo.

English football-a hming langsar Samir Nasri pawhin West Ham a zawm a, French midfielder hian Hammers a zawm hma hian club khelhna a neih loh avangin tun hma angin Nasri pawhin ngaihven a hlawh lo.

Liverpool-in Bournemouth hnenah FIFA U20 Golden Boot dawngtu Dominic Solanke chu pound maktaduai 17-in a hralh a, English forward hian Premier League-ah hnu hma a la neih tam loh avangin 'big signing' tiha chhiar tur a ni lo. Man City pawhin Solanke ang thoa hmabak nei êng Brahim Diaz chu Real Madrid hnenah pound maktaduai 15.5-in an hralh a, football ngainatute nghawng dawt khawp a la thleng lo.

Barcelona midfielder Philippe Coutinho chu Manchester United nen sawi zawm a ni a, English club hian Brazilian midfielder lalut tur chuan pound maktaduai 100 chuang an sen a ṭul tur thu an ziak thung. Coutinho hian United hi a zawm a nih ngat chuan Reds legend Michael Owen ang thoin Kop zingah a tla na tawh ngai lo ang.

Liverpool leh United te club inhal tak a ni a, April 1964 hnuah club pahnih inkarah player transfer a awm leh tawh lo. Kum 2007 pawh khan United chuan Gabriel Heinze chhuahtir pawi an ti lo a, amaherawhchu amah duhtu Liverpool-in buy out clause £6.8m thlengin ngam mah se Sir Alex Ferguson ten an remtih miau loh avangin Argentine defender hian Anfield a zawm tawh lo.

United manager lailawk Ole Gunnar Solskjaer hi a la nghet miau loh avangin club thuneituten Norwegian manager hi sum an vur tam a rinawm loh a, Old Trafford-a Coutinho kal loh chhan tur tam tak zingah hei hi pakhat a ni ang.

Solskjaer erawhin tlarhnung thuam ṭhat a duh a rinawm a, tun nipuia an dawr tawh kum 32 mi Uruguay defender Diego Godin chu an dawr nawn leh nia sawi a awm a, amaherawhchu Atletico Madrid lamin an phal lo niin an sawi thung.

Arsenal-in Atletico Madrid forward hlui Yannick Carrasco an melh a, Belgian winger hi Chinese Super League club Dalian Yifang tan an khel mek. Unai Emery chuan club thuneitute chu Barcelona midfielder Denis Suarez lalut turin ngen ngawl takin a dil niin sawi a awm a, thil thleng thei niin a sawi a awm bawk.

League champion lai Manchester City pawh Juventus forward Paulo Dybala nen sawi zawm a ni a, Argentina forward duhtu zingah pawh Bayern Munich leh Paris St-Germain te hming lam rik a ni bawk. Chutihrualin Dybala hi Italian champion duhlai a ni tih hriat a ṭha.

Chelsea erawh an lakluh tur aiin a chhuak tur lam thawm a ring zawk a, Spain striker Alvaro Morata chu Sevilla lamin loan-in an duh tih a awm a. Cesc Fabregas pawh Monaco-in Chelsea in a man a tana an chhiar zat an ngam veleh French lcub lamah kal turin an sawi. Kum 18 leka upa Callum Hudson-Odoi lak tumin  Bayern Munich-in Blues an dawr tawh a, amaherawhchu Maurizio Sarri-a'n chelh tumin a ṭang na hle.

Liverpool leh Tottenham te thawm a reh a, chutihrualin transfer lai hi chuan engpawh a thleng thei reng a ni.