New Zealand tan Just-a goal a tawk lo

Motherwell forward Elijah Just-a'n goal hnih khung mah se New Zealand chak nan a tawk zo lo. Nimin zing inkhelah New Zealand hi Iran nen 2-2 in an inhnehtawk a, Ramin Rezaeian leh Mohammad Mohebi te goal hmangin Team Melli (Iran sawina) tan siphurh an sut ve ve.

Minute sarihna lekah Just hian Nottingham Forest forward, Chris Wood nen mawi taka Iran tlarhnung an ṭhiah hnuah chiang zetin a hlap goal a, New Zealand hma a hruaipui. Wood leh Liberato Cacace ten chance neih chhunzawm mah se, Iran keeper Alireza Beiranvand tan hna hautak an siam thei lo.

New Zealand an phur viau laiin Iran zawkin goal an khung a, Mohebi chuan hnai tak aṭangin an siphurh sutna goal a khung a, keeper Max Crocombe tan dan ngaihna a awm lo. All Whites player-te an hawihai hle. First half hun pek belhah Iran defender Ali Nemati chuan tauh lut leh mah se, a offside avangin an sut leh a, 1-1 in halftime an hmang.

Second half-ah New Zealand an phur tawk lo a, first half nen khaikhinin an danglam. Mahse Just-a bawk a rawn lang hlawl a, Wood nen bawka an in pass hnuah ṭha takin a pet goal a, a team hma a hruai nawnpui.

Mahse, Iran an beidawng duh bik lo a, Ramin Rezaeian cross chu Mohebbi-a'n lo tauhin goal ban a fuh hnuah a goal a, an siphurh an sut nawn. Hun tawp lamah Iran an hlauhawm zawk a, mahse goal an khung theih tawh loh avangin 2-2 in inkhel a tawp.

Iran hi USA-ah hi World Cup an khel thei dawn lo emaw tih hnua khel leh an ni a, an tel dawn tih chian hnu thleng pawhin Iran hian an inbuatsaihnaah buaina neuh neuh an tawk. Iran staff ṭhenkhat chu visa pek an ni lo a, hei vang hian Arizona-a inbuatsaih tum kha Mexico-ah an thlen phah ta zawk.

Group G-a team zawng zawngin point khat an hmu vek a, Belgium leh Egypt pawh an match hmasa berah an inhnehtawk avangin point thum nei an awm lo a, an inkhel leh zel turah mipui ngaihven an hlawh dawn.