Barca-in Rashford chelh lo

Spanish champion Barcelona chuan La Liga champion an nih theih nana player pawimawh, Manchester United aṭanga loan-a an hawh Marcus Rashford chu a nghetin an la dawn lo.

Barca-in Rashford an hawh dawn khan United nen inremna an nei sa a, an inremna ang chuan Catalan club hian season khat zawh hnuah an duh chuan pound maktaduai 26-in an lei thei ang tih a ni.

Mahse, Barca hian English forward hi a ngheta an duh dawn a nih chuan June 15 hmaa an tihfel a ngai a, Catalan club hian Thawhṭanni thleng khan United an dawr zui loh avangin a nghetin an la dawn lo tih a chiang.

La Liga champion hian Newcastle United aṭangin Anthony Gordon an la lut tawh a, English forward manah hian £69.3mtd lai an insen avangin a ngheta Rashford an lak loh mai rinna kha a awm daih tawh.

Spanish media ṭhenkhat chuan, Barca hian Rashford hi man tlawm zawka lak emaw, loan bawka hawh nawn an duh niin an sawi a, mahse, Manchester United hi an inremna hmasa aia hniama tawlh an tum lo.

Hetihrual hian Rashford hian United-ah hian a hlawh hnem viau a, kar khatah £325,000 hlawk mekin, kum hnih atan contract a la nei! Mahse, United neitu zinga mi Sir Jim Ratcliffe chuan player-te hlawh tihhniam a duh nia sawi a ni a, hetiang boruak karah Rashford lawm let hi an châk viau lo ang.

Hei mai a ni lo - United hian Rashford hi an thlah fel tawhah an inngai a, Brazilian striker Matheus Cunha chu a number hak ṭhin, number 10 chu an lo hlan fel diam tawh bawk.

Hetihrual hian United hi Ruben Amorim-a'n enkawl tawh loin, Rashford-a nena khel dun ṭhin Michael Carrick-a'n a enkawl tawh a, English coach hian United coach lailawk a nih laia a lo kaihhruai tawh ni bawk forward hi a iai lo ang.

Mahse, United thuneitu sang lam chuan Rashford hi chhuahtir ngei an duh ang tih a chiang a, World Cup-a a chet ṭhat an beisei ang - a chet ṭhat phawt chuan duhtu a ngah sawt dawn!

Kum 28 mi Rashford hian season hman zawh takah khan Barcelona tan inelna hrang hrangah match 49 khelin goal 14 a khung a, assist vawi 14 a nei. Bayern Munich-in an ngaihven mek niin an sawi.

United hian Rashford hi Premier League club-ten an duh a nih chuan £40mtd-a lei an phal nia sawi a ni bawk a, mahse, heng zingah hian an hmelma kumhlun Liverpool leh Manchester City an tel lo - club pahnih hian Rashford hi awt viau pawh ni se, an lei ve thei lo tihna a nih chu!