Thlasik bazar a ngaihnawm ṭhin

Premier League club-in Janua­ry transfer an hmang ṭang­kain ṭhin. Kum 2007 khan Henrik Larsson chuan Swedish football club Hel­sing­borg aṭangin Manchester United chu loan-in a rawn zawm nawlh a, Sir Alex Ferguson hoa Premier League an champion-na kawngah a ṭangkai hle.

Tun ṭumah erawh thil hlui lutuk phawrh loin nikum thlasik transfer lian zual kan tarlang dawn.

Nikum January thla khan Liver­pool chuan hun rei tak an hel tawh Virgil van Dijk an lalut a, Dutch defender hi pound maktaduai 75 man zet a nih avangin 'manto uchuak' tiha sawi a ni a. Amaherawhchu, tun thlenga a khelh dan thlir chuan Jurgen Klopp hian Celtic defender hlui manah hian pek pelh pawh ngai se a inngaihtuah buai lo tawp ang.

Nikum January-a thil thleng langsar tak chu Jose Mourinho-a'n Manchester United-ah Alexis Sanchez lakluh a duh avangin Henrikh Mkhitaryan chu a tawktarh a, pound maktaduai 26.3 zeta Old Trafford-a lakluh Armenia international pawhin London club zawm hi hreh loin player langsar pahnih an inthleng.

Tu nge hlawk ber tih chuan Alexis niin a lang a, kum chanve bak Gunners-a contract nei tawh lo hian chhiah pek zawhah kum khatah pound maktaduai 14 a hlawh a, kum li leh a chanve contract a ziak bawk. Chilean forward hi a chet ṭhat loh avangin tun thleng chuan United an chesual zawk niin a lang a, Arsenal tan chuan inchhirna tur a awm niin a lang lo.

Philippe Coutinho chu Liver­­pool-ah fachuam nih aiin Bar­celona kawr ha pha nih a thlang a, Reds ṭantute thinlung hliamin Catalan club hi pound maktaduai 142 zetin a zawm. 

Barcelona hian Coutinho atan sum ṭhahnem tak an sen ngam hi Neymar hralhna aṭanga pawisa an lakluh tam avang leh Brazilian midfielder hian Andres Iniesta te hmunruak zau tak tizim thei tura theihna a neih avanga lalut niin a lang. Liverpool tan erawh chelh rual a ni lo a, chutihrualin Coutinho an hralh hi Virgil van Dijk an lakluh theihna chhan ni lawi si.

Arsenal-in Arsene Wenger-a hun tawp lamah result ṭha bei­seiin sum an thehchhuak hnem a, nipui bazara manto taka Alexandre Lacazette an lalut tawh nachungin Borussia Dortmund aṭangin pound mak­taduai 55.4 zetin Pierre-Emerick Aubameyang an lalut.

Gabon striker goal khung thei zet hian Wenger-a chhuak tur chu chelh ding zo bik lo mah se Borussia Dortmund striker hlui hi chuan Unai Emery hnuaiah pawh hmun a chang chhunzawm zel.

Pep Guardiola-a'n hma thlir thui tak a nei tih January transfer-ah a lang a, Athletic Bilbao aṭangin pound maktaduai 57 zetin Aymeric Laporte a lalut. Season liam ta khan French defender hian English football kalhmang a zir a, tun season-ah chuan defender pawimawh ber tiha chhal theih a ni.

Tottenham-in PSG aṭangin Lucas Moura an lalut a, Mauricio Pochettino-a'n chhawr nghal vut vut loin dawhthei takin Brazilian forward hi a enthla a, tun season player ṭangkai zinga mi a ni.

Olivier Giroud hi Arsenal duh loh a ni thei a, amaherawhchu Gunners duhlai Alexandre Lacazette aiin France team-ah a tlatlum zawk. FIFA World Cup champion team zinga mi Giroud hian Chelsea hi nikum khan pound maktaduai 19 in a zawm a, langsar si loin kil khata lung pawimawh a ni.