League Cup champion Man City inlan hun

Manchester City chuan zanin dar 1:15 hian Carabao Cup semifinal leg 1-ah Burton Albion an mikhual dawn. Second leg hi Football League One club khelmualah January 22 hian khelh a ni ang. 

Carabao Cup leh league champion lai Manchester City mual Etihad Stadium-a khelh a nih dawn avangin Burton tan chak aiin inhnektawkpui chu an beisei tur niin a lang.

Manchester City hi dan theih an ni tih chu Krismas leh kumthar vuakveta Crystal Palace leh Leicester City in an hneh dan aṭangin a lang chiang a, amaherawhchu tun dinhmunah erawh match thum a zawna chak zo hlim an nih avangin League One club tan chuan 'dan rual loh' tiha sawi theih tur an ni. Match hnuhnung pathuma Pep Guardiola hote hneh zingah Liverpool a tel a, Jurgen Klopp-a hote hi City nen an inkhelh hma hian football zirchiang ṭhinte ngaihdanah an buk a rih zawk hial. Chuvangin Man City-in hnehna an chan chiah hian point thum chauh hlawh chhuak loin inrintawkna an nei let a, team dang daih a ni leh tawh.

Burton Albion aia division khata sang Rotherham United pawh 7-0 zetin an sawp a, Etihad Stadium-ah hian City-in zahngaihna an lantir lo a, ṭan a ṭanga a tawp thlengin attacking football an khel a, a khat mawi tawkin an khung a ni ber. Burton tana chanchin hriat nuam lo dang chu Man City player inhliam an dam ṭan a, an theihna angin an rawn khel chhuak leh thei tawh.

FA Cup-a hnehna an chan ṭum hian City squad chhah zia a lang a, inkhel bul ṭantu zingah keeper Ederson, defender John Stones leh forward Raheem Sterling te chiah chu Liverpool an hneh ṭuma bul ṭantute an ni a, Pep Guardiola-a'n an player pariat zet thlak mah se an hming aṭanga en chuan an ṭhat dan ber ang mai a la ni.

Burton hian league match hnuhnung berah Rochdale 4-0 in an hneh a, Man City hmachhawn turin phurna a pe dawn a, an squad inthlauh dan erawh la ngai reng ang.

Burton manager Nigel Clough chuan, "Tun hnai kum hnih khat chhunga an khelh dan en chuan League One club tan chuan zamna tham a tling. Pep Guardiola hian a player ṭha chu a awltir ngei a, keini tan erawh an la ṭhat em avangin han lawmna chiam tur a ni lo," tiin an inthlauh thu a sawi.

Clough chuan sawi chhun-zawmin, "Etihad Stadium-ah eng result pawh thleng se, beisei tur nei tawh lo pawhin chhuahsan ila Pirelli Stadium-a inkhel entu an thlak hniam phah lo ang. Man City inkhel hi chu mi zawng zawng en châk a ni," tiin an inthlauh thu a pawm thlap.