A umtu zawk kan ni - Neuer

Bayern Munich captain Manuel Neuer chuan Bundesliga nomawi an kawl lai humhim a awl-sam loh tur thu a hria a, tun dinhmunah Borussia Dortmund umtu zawk an nihna chu hriat chian a pawimawh thu a sawi.

German champion hian manager thar Nico Kovac kaihhruaina hnuaiah season bul an ṭan fuh tawk lo. Mahse, tun hnaiah insiamṭhain table-ah pahnihna an ni leh tawh, hma-hruaitu Dortmund an phak lohna chu point ruk chauh a ni leh tawh.

Kum 32 mi Neuer chuan, "Season chawhnu lam hmang turin inbuatsaihna kan nei mek, harsatna awm loa training ṭha taka ka nei thei hi nuam ka tiin ka phur hle. A hnuai zawka awm kan nihna hi ka hriat chian a ngai a, kan chunga awm lehthal thei turin thapui kan thawh a ngai dawn.

"Thlasik chawlh hnua kan match hmasa atan khualmualah Hoffenheim kan hmachhawn dawn, a awlsam dawn lo tih chu hriat sa a ni. League bikah chuan point thum hmuh zel a pawimawh tawh a, inelna dangah pawh hnehna kan chan tluan theih nan tunah hian ruahmanna fel tak kan siam tawh a ni," tiin a sawi.

Bayern Munich hian Champions League-ah last 16 an lut tawh a, Premier League hma-hruaitu Liverpool nen an inhmachhawn ang. German Cup lamah pawh Hertha Berlin nen an inkhel dawn - Bundesliga ngaihpawimawh a ngaih bawk avangin an hmabak a hautak dawn hle.