Awadhe Warriors-in semifinal hnaih

Premier Badminton League (PBL) khelh mekah Awadhe Warriors chuan Chennai Smashers 4-3 in an hneh a, Warriors hi table-ah pahnihna niin semifinal lut thei turin an dinhmun an sawhnghet zel.

Sree Kanteerava Indoor Stadium, Bengaluru-a inkhelah Awadhe Warriors tan world number 5 Son Wan Ho chuan Rajiv Ouseph 2-0 in an hneh a, Chennai lam tan Korean shuttler Sung Ji Hyun-a'n hneh loh nei loa a kaltluanna chhawm nung mah se a team a chak pui zo chuang lo.

Sung bakah hian Chennai lam tan mixed doubles pair Chris leh Gabby Adcock ten hnehna chang ve mah se, Warriors lamin mipa singles leh doubles huanga hnehna an chan bakah Lee Yang leh Mathias Christiansen ten an trump match-ah hnehna an chan bawk avangin dinhmun ṭha zawkah an ṭang.

Point li an hmuh belh tak avangin Warriors hian a pumpuiah point 20 neiin table-ah pahnihna an nei mek a, an chungah hian champion lai Hyderabad Hunters awmin an inthlauhna chu point khat chauh a ni.

PBL team pakua aṭang hian an inkhelh kual hnuah a sang pali ten semifinal an khel dawn, zanin hian hmahruaitu Hyderabad Hunters leh a hniam bera awm lai Delhi Dashers te an inhmachhawn ve leh ang.