Kolkata khawpuiah 'Mizo show'

I League nomawi chawi tum East Bengal chuan nimin khan an mikhualna ramah Indian Arrows chu 2-1 in an hneh a, he inkhelah hian Mizo an lansarh em avangin 'Mizo show' tia sawi hial tlak a ni. 

East Bengal tan hian Laldan-mawia Ralte chuan goal khat a khung a, Lalrindika Ralte-in penalty a hlah a, Lalramchullova chu hnawhchhuah a ni bawk. 

Kolkata club-in Aizawl FC leh Minerva Punjab a zawna an hneh loh hnuin an match hnuhnung paliah vawi thum hnehna an chang leh ta a, champion an sawi ri ngam ve leh tawh ang. 

Vawiinah I League inkhel pakhat a awm dawn a, chawhnu dar 2:00-ah coach thar Khalid Jamil neitu Mohun Bagan chuan Minerva Punjab an mikhual ang. 

Mizoram football-a 'Sialhawk Express' tia hriat lar Laldanmawia Ralte chuan minute 26-na lekah volley hmangin goal hmahruai a khung a, Jaime Santos ball cross aṭanga a goal khung hi goal ṭha bik a ni. 

Danmawia a awm mai mai lo. Goal-a khung aṭangin minute nga a liam hman chauh tihah penalty a hlawh chhuak lehnghal a, a pet turin Mizo tlangval Lalrindika Ralte a lo pen chhuak. 

Mahse, Lunglei tlangval hian hming chherna remchang a neih chu a khawhral a, Arrows keeper ṭhangduang Prabhushkan Singh Gill chuan East Bengal captain pet hi a dan sak. 

East Bengal tan minute 57-naah thil duhawm lo a thleng a, Mizo tlangval Lalramchullova chu mawi lo taka a chet avangin red card pek a ni a, Kolkata club-in kim loa an khelh a ngaih phah. 

Mahse, kim lo East Bengal an vanneih chhunzawm a, Joby Justin hun a her chhuak. Tun season Indian striker 'hot' ber pawl hian Samad Ali-a shot Arrows keeper Gill-a dan per chu goal-ah a chantir - tun season I League-a a goal sarihna a ni. 

Hun tawp nan minute nga chauh a awm tawh tihah Arrows striker Aniket Jadhav chuan a yellow card pahnihna a hmuh avangin hnawhchhuah a ni ve leh bawk a, minute 90-naah penalty hmangin Khuman-them Ninthoinganba Meetei chuan goal khat a khung ve bawk - comeback nan erawh a tlai tawh.