Rashford duhtu zingah City leh Liverpool

Manchester United forward Marcus Rashford chu loan-a a khelhna Barcelona-in lak zui tum lo mah se, an elpui Manchester City leh Liverpool te chuan an ngaihven hle niin khawthlang chanchinbuten an ziak.

Kum 28 mi Rashford hian season hman zawh takah khan, Barca tan match 49-ah goal 14 leh assist 14 a nei thei a, La Liga nomawi a chawipui. Catalan club hian Rashford hi a ngheta lak luh theih dan nei mah se, Newcastle United aṭangin Anthony Gordon an la lut tawh a, Englsih forward hi lak zui an tum lo.

Hetiang karah hian United hmelma pahnih City leh Liverpool an lo lang a, Rashford duhtu zingah an hming a ri. United thuneitu lamin Rashford hi club dang a zawm phalsak mah se, City leh Liverpool a zawm dawn a nih chuan amah lakchhuah theihna zat pound maktaduai 40-in an phal dawn lo nia sawi a awm bawk.

United leh Liverpool inkarah indawrna a thleng khât a, Phil Chrisnall chu a hnuhnung ber niin April 1964 khan Old Trafford aṭangin Anfield a pan. City leh United karah pawh Tevez chu a hnuhnung ber niin, kum 2009 khan United aṭangin an ṭhenawm club-ah hian a lut.

Club pahnihte leh United boruak a ṭhat loh bakah Rashford hian United-ah kum hnih daih conteract a la neih avangin, Reds leh Citizens tan awlsam taka lak luh theih a ni dawn lo.

Rashford hi tunah England tan World Cup khelin a fehchhuak mek a, ram tan a khel ṭha a nih chuan amah duhtu an pun sawt a rinawm.