Australian Open a hmuhnawm dawn

Tennis season khat chhunga Grand Slam hmasa ber Australian Open chu January 14 aṭangin Melbourne, Australia-ah khelh ṭan a ni dawn a, player langsar zingah Juan Martin del Potro tih loh chu an inlan kim thei tura ngaih a ni.

Roger Federer leh Novak Djokovic ten nomawi an chawi leh a nih chuan mipa player zingah Australian Open vawi sarih champion thei hmasa an ni ang a, hmeichhe champion lai Caroline Wozniacki tan major title hmasa ber leh neih chhun ni bawk humhim tum chu hna hautak a ni dawn.

Tun Australian Open-ah hian a vawi khat nan set hnuhnung berah tie break hman a ni dawn, 6-6 a nih hnuah tie break khelh tur niin; point 10 hmu tling hmasain a tlem berah point hnih china hma a hruai fal thei a nih chuan chak zawk a ni ang.

Dan pangngaiin mipa singles hi best of five a ni dawn a, hmeichhe singles erawh best of three a ni leh ang. Inelna hi nipui laia neih a nih avangin mipa singles bika set thumna an khelh zawh hnuin, khaw lum vanga chawlh a ngai a nih chuan minute 10 chhung chawlh lak theih a ni dawn a ni.

Kar hmasa khan Brisbane International aṭangin Rafael Nadal a inhnukdawk a, Spanish tlangval hian Australian Open inbuatsaihna tournament khelh ngei duh mah se, "MRI scan neih a nih hnuah doctor ten inkhel rih lo turin min duh," a ti. 2009 champion hi a inlan a nih pawhin a ṭhat dan berin a inpeih hman a rinawm loh.

World number 1 hlui Andy Murray-a'n tun hnaiah match a khelh hnem loh avangin a ranking a hniam a, world number 240 hi seeded a nih phak loh avangin round hmasa ber aṭangin player ṭha a hmachhawn thei dawn; January 10-a draw an neih tur pawh a ti ngaihnawm zual tura ngaih a ni.

Britain tlangval hi Australian Open-ah hian vawi nga ngawt pahnihna a ni tawh, Melbourne-ah hian la champion chiah lo mah se player hmachhawn châkawm loh berte zinga mi a ni dawn - a khelh fuh ni chuan champion tura rinkai Federer leh Djokovic te barakhaih thei tura ngaih a ni ang.

Australian Open khelh hunah chuan Roger Federer hi kum 37 mi a ni tih sawi nawn fo a ngai leh dawn. Swiss star hi a kum a tam deuh tawh tih chu hriat sa a ni a, chutih rualin nomawi kawl mektu a nihna pawh hriat tel a ṭul.

Grand Slam vawi 20 champion tawh hian tennis a khelh hun chhungin nomawi 99 a chawi tling tawh a, mellung pawimawh leh hlu bik phun turin nomawi pakhat a la mamawh chu Melbourne-ah tihhlawhtlin a tum ang.

Federer leh Nadal inbeihna kara rawn ding chhuak thei Novak Djokovic chu tun inelnaah hian champion tura rinkai a ni. Kum 31 mi Djokovic hian nikum June thla hnu lamah a khel ṭha thar a, Wimbledon leh US Open nomawi a chawi theihna kawngah match 32 aṭangin vawi khat chiah chak loh a nei - a zawna Grand Slam nomawi pathum chawi turin a dinhmun a ṭha hle.

Tennis 'Big Four' tia sawi ṭhin Federer, Nadal, Djokovic leh Murray te thlak tur an awm a nih chuan Alexander Zverev hi a beisei awm berte zinga mi a ni mek. German tlangval hi kum 21 mi a ni tawh a, a theihna a san viau rualin major title a la vaw chhuak lo; a hun a inher chhuak dawn em tih chu fiahin a awm dawn.

A zawna Grand Slam panga nan Simona Halep chu seeded pakhatna a ni dawn, Romanian nula hi nomawi lian tham chawi thei lo tia sawi ni ṭhin mah se season hmasa khan French Open a chawi - nikuma final a luh tawhna hmunah hian rinkai a ni.

Seeded pathumna ni chungin Caroline Wozniacki a inlan dawn. Denmark nula hian season hmasa khan Halep hnehin nomawi a chawi a, Grand Slam dangah hlawhtling zui rih lo mah se Australian Open bik hi chu a inkhelh thiamna hmun a nih avangin hmachhawn a châkawm loh ang.

Australian Open vawi hnih champion tawh Angelique Kerber hi a dinhmun tur hriatthiam a har. German nula hi a khelh fuh ṭum chuan hneh theih loh khawpa khawng ṭha a ni, mahse a chet fuh loh ṭum erawh chuan player langsar lo zawk hneh loh vangin hma takah a tla fo.

Japanese player zinga Grand Slam chawi hmasa ber Naomi Osaka hian Serena Williams a hneh thei, kum 21 mi Osaka hi player chhinchhiah tur bik zingah a tel. Chutih rualin tun ṭumah hian Grand Slam vawi 23 champion tawh Serena a chungnung a nih pawhin thil mak tia sawi tur a ni lem lo ang.