Vawiinah HPC Cup quarterfinal

Lunglei District chhung inelna ngaihhlut HPC Cup quarterfinal chu vawiin hian Ṭhuamluaia mual, Lungleiah khelh a ni dawn. Chawhma dar 11:00-ah Zobawk South leh Lunglawn te an inkhel ang a, chawhnu dar 2:00-ah Thiltlang leh Zotlang te an inkhel zui ang.

June 20, Inrinniah quarterfinal hi khelh chhunzawm a ni dawn a, Hnahthial South II leh Bazarveng te chawhma dar 11:00-ah an inkhel ang a, Zohnuai leh Serkawn ten a tawp an khar ang.

ISL leh IFL chawlh lai a nih avangin HPC Cup-ah player langsar an ṭhahnem. Zobawk South-ah Isak Ralte a che ṭha a, Lunglawn lamah Jeremy Laldinpuia chu an innghahna a ni. Thiltlang tlarhnungah Lalmuanawma (Munez) a ding khawng ṭha a, an khingpui tur Zotlang lamin C. Lalhriatpuia, Lalnunzira leh Laltluangliana leh F. Lallawmkima te an kawl.

Bazarveng-in player langsar an ngah a, Edmund Lalrindika, Brandon VL Remdika leh Zomuansanga te an awm avangin an goal bawh a na dawn. An khingpui tur Hnahthial South I hi Lalrinfela (Mafela) khelhna a ni thung.

Lallianzuala Chhangte te veng Zohnuaiin Lalrinliana Hnamte leh Lalrinzuala te an la a, Serkawn lamah HP Lalremruata leh Lalthankima te an awm. India ram pum huap pawha player langsar an ṭhat hnem avangin HPC Cup-ah entu an ṭhahnem ṭhin hle.