Pulisic-a dinhmun a chiang lo
World Cup thlengtu zinga ram langsar bera chhal ngam USA chuan zanin dar 12:30 hian an match hnihna an khel dawn a, Australia an hmachhawn dawn - hetiang boruak karah hian player pawimawh Christian Pulisic-a dinhmun a chiang lo.
US hian an match hmasa berah Paraguay chu 4-1 ngawtin an sawp a, an khel ṭha takzet - kha inkhelah khan Pulisic hian assist vawi khat a nei a, Paraguay midfielder Damián Bobadilla-a'n an lama a tihluh chu Puisic-a thawhrah aṭanga thleng a ni bawk.
Mahse, he inkhelah hian hliam tenau vangin Pulisic hi lakchhuah a ngai a, inkhelh zawhah coach Mauricio Pochettino chuan a player ṭha mi chu, "A kal ṭhat hleihtheih loh avangin kan la chhuak a ni," tiin a sawi.
Inkhelh zawhah Pulisic hian, "Thil serious tak a nih loh hram ka beisei," a ti zui a, mahse, Australia an hmachhawn hmaa an training-naah Pulisic hi a chawn na tuam chungin a inlan a, a ṭhiante training pawh zawm ve loin, a hranpaa training neih tir a ni.
Australia nena inkhel tur USA tan Pulisic hliam hi a na a nih chuan a pawi thui dawn tih a chiang a, hetihrual hian an match hmasa bera an chak tawh tho avangin coach Poch-a'n damkawr chunga chhawr ai chuan hahdamtir a thlang mai thei.
Hetihrual hian Australia hian US ang thoin an match hmasa berah hnehna an chang nghal a, rin hlawh lo zawk an ni chungin, an match hmasa berah Turkey chu 2-0 in an hneh - Socceroos phur vanglai tak a ni a, tun hma angin star langsar nei lo mah se, thawhhona ṭha chu an innghahna a ni.
Australia tan Turkey laka goal khungtu Nestory Irankunda bawk hi hmuhnawm leh tura ngaih a ni a, kum 20 mi forward hi English club Watford tana khel lai niin, a kum aṭanga teh chi a ni lo - goal hmaah a hriam hle.
Hetihrual hian US hi golden generation an tih khawpa an squad ṭhat vanglai tak a ni a, khawvel huap pawha coach langsar Poch an nei bawk - Pulisic inlan thei lo pawh ni se, Juventus midfielder Weston McKennie, AS Monaco striker 'hot' Folarin Balogun leh PSV Eindhoven fullback Sergiño Dest te an nei a, bench aṭanga danglamna thlen turin Borussia Monchengladbach attacking midfielder Giovanni Reyna an la nei cheu bawk.
USA hian an ram ngeia World Cup inkhelah group stage-a lungawi an harsat dawn a, a sang thei ang ber thlen an duh - chumi tur chuan team ṭha an hneh a ngai a, round of 32 lut mai ni loin, an group-a team awm zawng zawng hneh chunga knockout round luh an duh ang.