World Cup zawha chawl tur Ochoa

Mexico goalkeeper Guillermo Ochoa chuan football a chawlhsan dawn hnai a, kumin World Cup khelh zawhah hian a football zinkawng a tawp dawn niin journalist rintlak Fabrizio Romano chuan a tarlang.

Kum 40 mi Ochoa hian an ram club Club América aṭangin a career a ṭan a, club hrang hrang 11 tan khel hmanin tunah hian Cyprus club AEL Limassol tan a khel mek. Khawvelin a hriat ṭanna erawh 2014 World Cup-ah khan a ni a, Mexico tan goal vengin vawi tam a team a chhanhim a, a mizia leh a sam zawng zawng nen mi hriat a hlawh hle.

Brazil-a World Cup khelh a nih hnu hian Ochoa hian rimtu ngah mah se club liam a zawm lo a, mahse khawvelin a hming a theingilh ngai lo a, World Cup 2022 thleng khan Mexico si ban nghaktu a ni reng.

Mexico tan Ochoa hian vawi 150 chuang a khel tling tawh a, Gold Cup vawi ruk a chawi tawh bawk. Kuminah a vawi rukna atan World Cup squad-ah thlan a ni bawk a, a khel a nih chuan a vawi ruk nan a khel dawn a, Cristiano Ronaldo leh Lionel Messi te huangah a awm ang.

A kum a tam ve tawh avangin Ochoa hi ram tan rinrawl a ni pha tawh lo a, tun hnaiah Raúl Rangel chu Mexico tana goal vengtu a ni a, Mexico manager Javier Aguirre pawhin Rangel hi first keeper-ah a hman ber a ni.

Ochoa chuan, "Mexico national team hi ka eizawnna leh ka nun kawng min kawhhmuhtu pawimawh a ni a, ram tan hian khel lo ta ni ila chuan ka career hi eng nge a an ang tih pawh ka ngaihtuah thiam lo.

Tunah hian ram tana ka khelh hun a lo tawp dawn hnai tawh a, ka tel loin kan ram pawh an ngaihtuahawm lo. Ka hun hman tawh zawng zawng khan minti hlim a, ram tan theihtawp ka chhuah ṭhin," a ti.