Myanmar-a ruihhlo siamna hmun 13 tichhia

Myanmar sipai leh police-te chuan China intelligence puihnain an ram chhunga ruihhlo siamna hmun 13 an tichhia tih Office of China National Narcotics Control Commission chuan a sawi.

Ruihhlo siamna hmun 13 an tihchhiatnaah hian ruihhlo an man tam ber ber record an siam bawk tih Ministry of Public Security-a narcotics control bureau executive depouty direcotr, Wei Xiaojun chuan press conference-ah a sawi a ni. Kumin January thla khan Myanmar sipai leh police-te nen thawk hoin Myanmar hmar lama ruihhlo siamna hmun, tawlh rukna hmkun leh telecom hmunte chu an dap tih a sawi bawk. Beihpui an thlaknaah ruihhlo siam chhuahna hmun 13 tihchhiat a nih bakah, methamphetamine ton 2.47, ruihhlo siamna hmanrua ton 490, non-controlled chemical ton 952 bakah hmanraw dang set 83 an man bawk a ni.

Kum 2025 aṭang khan China narcotic control bureau hi Myanamr sorkara ruihhlo do hna thawktu lam nen vawi tam tak inbe pawhin, ruihhlo siamna hmun chungchangah information pawh an inpe tawn a ni. Wei chuan an thawh ho chhunzawm zel tur thu sawiin, Myanmar sorkarin ruihhlo do hna a thawhnaah an thlawp zel dawn tih a sawi bawk.

China chuan ram hrang hrangte nena ruihhlo dona lama dan kengkawhtute thawh hona tihchak zel a tum a, Myanmar bakah Thailand, Laos leh Vietnam-te pawh thawh hona an tel a ni. China, Laos, Myanmar, Thailand, Vietnam leh Cambodia-te'n an hman tlan 'Safe Passage' campaign chu an tinghet zual dawn a tih an sawi.