Tlak hlau Tunisia hmaah Japan

Group F-a Africa khawmualpui aiawh Tunisia chuan Pathianni zing dar 9:30-ah Japan an hmachhawn dawn a, Tunisia hi tla thei dinhmuna ding an ni tawh a, Japan hi chak la nei lo an nih avangin inkhel hmuhnawm hmuh a beiseiawm.

Kuminah Japan hian an player pawimawh Kaoru Mitoma, Wataru Endo leh Takuma Minamino te tel loin inelna an hmachhawn a, an match hmasa berah Netherlands nen inhnehtawkin an khel chhe lo. Mahse Japan hi champion tura rinkai ni lo mah se thleng sang tura beisei zinga mi an ni a, point khat chauh an la hmuh avangin Tunisia lakah chak ngei an tum dawn.

Samurai Blue tan Takefusa Kubo chu Netherlands nen an inkhelh ṭuma a khup a tihhliam avangin a inlan thei dawn lo va, Real Sociedad forward awm lo tur hi Japan tan channa nasa tak a tling.

Chutihrualin Japan tan Ritsu Doan, Daizen Maeda leh Ayase Ueda te an la nei a, football thiam vanga hriat hlawh Netherlands laka 'comeback' thei an nih avangin an la ṭha thawkhat viau.

Tlarhnungah Arsenal defender hlui Takehiro Tomiyasu leh Bayern Munich defender, Hiroki Ito te an awm thei dawn a, si ban nghak turin Parma keeper Zion Suzuki a awm leh dawn bawk a, Tunisia lakah chak tura rinkai zawk an ni tho.

Hetihlai hian Tunisia pawh an buai a, an match hmasa bera Sweden lakah 5-1 ngawta an tlawm hnuah an coach Sabri Lamouchi chu an ban a, Lamouchi hian Tunisia hi match nga bak a enkawl hman lo.

World ranking-a 55-na ni phâk Tunisia hian an match hnuhnung pariatah vawi khat chiah chak an nei a, an match hnuhnung pathumah goal 11 ngawt chhuahin goal khat chiah an khung bawk. Japan lakah an chak lo leh a nih chuan an match hnuhnung berah, Netherlands an hmachhawn leh dawn avangin an hmabak a ko dawn hle.