Ivory Coast lakah Germany fiahna

FIFA World Cup 2026-ah Germany-in team tenau Curacao 7-1 a hnehin bul an ṭan a, zanin dar 1:30-ah erawh African team ṭha Ivory Coast an hmachhawn dawn. Elephants lakah Julian Nagelsmann hote dinhmun a hriat theih dawn a, Die Mannschaft hian hnehna an chang a nih chuan kum 2014-a an champion hnua second round an luh lehna hmasa ber a ni ang.

Group E inkhel dangah Ecuador leh Curacao te an inkhel dawn a, Pathianni zing dar 5:30 hian Kansas city an inkhel ang. Team pahnih hian point an la hmu lo ve ve a, knockout stage lut tur tan chak a pawimawh ang.

Goal sarih khungtu

Germany khingpui Curacao an tenau a ni thei a, chutihrualin Spain leh Cape Verde bakah Portugal leh DR Congo te an inhnehtawk avangin match khata goal sarih khung hi a ropui hrim hrim. Inelna ṭan hmaa champion rinkai ni phak lo chiah lo mah se match hmasa bera an khelh dan vangin champion tura ringtu an awm pawhin thil mak a ni lo.

Mahse, Germany hian goal sarih an khung theihna inkhelah goal an chhuah a, inenfiah a ṭul. Captain Joshua Kimmich-a'n right back hna chelh mah se nuam a tihna ber mual lai aṭanga ball a sem hmuh tur a tam a, Bayern Munich nena sawi zawm Nathaniel Brown pawhin goal nawr nuam a ti hle.

Curacao ṭhat tawk loh vangin wing back pahnih kalsan hmunruak hian nghawng a nei tam lo a, team ṭha zawk Ivory Coast lakah fimkhur a ṭul dawn. Tlarhma lam tan hna a harsa dawn a; Jamal Musiala leh Florian Wirtz te innghahna tlak a ni em tih a chiang bawk ang.

A hming Havertz

Argentina captain Lionel Messi-a'n hattrick a siam a, a ropui. Goal khungtu ropui dang Kylian Mbappe, Erling Haaland leh Harry Kane ten goal hnih ṭheuh an khung a, fak an hlawh lawm hle.

Goal khung theih avanga khawvel hriat lar player-ten tun World Cup-a goal an khung hmain Kai Havertz-a'n goal hnih a khung tawh. Havertz hian Champions League final-ah goal a khung a, Premier League inkhel pawimawhah Manchester City laka goal a khung thei a, tun inelna hi hming chher lehzual nan a hmang thei ang.

Germany hi no. 9 nei ṭha tawk loa ngaih an ni a, mah se Havertz hi mamawh chhanna a ni thei tlat. Havertz bakah hian Deniz Undav leh Nick Woltemade te an kawl a, Undav hian Curacao lakah goal a khung.

Team ṭha Ivory Coast

Ivory Coast hian kumin January khan AFCON quarterfinal-ah Egypt an hneh lo a, hemi hnu hian an khingpui an hneh vek. Elephants hnehte hi South Korea (4-0), Scotland (1-0) leh France (2-1) te an ni a, World Cup khel pha vek an ni.

Emerse Faé hote hia match hmasa berah Ecuador 1-0 in an hneh a, Germany nen an point hmuh zat a inang chiah. Ivory Coast hian mual sir aṭanga nawr turin

Yan Diomande leh Nicolas Pépé te an nei a, match hmasa berah Amad Diallo pawh a lut pha lo. Chutihrualin Amad hi Germany lakah bul a ṭan thei bawk.

Toronto-ah an inkhel dawn a, Ivory Coast striker Elye Wahi chu Canada sorkarin luh phalna an pek loh avangin khelh thei lo tur ngaih a ni. Mahse, tunah chuan chinfel a ni tawh a, Eintracht Frankfurt striker hian Germany a hmachhawn thei ang.