South Africa an nil bik lo

South Africa chuan Zirtawpni zan khan Czech Republic 1-1 in an inhnehtawkpui a, group A-ah hniam ber mah se point khat hlu tak an hlawhchhuak a, round of 32 luh beiseina an insiam.

Czech Republic tan Michael Sadilek chuan an hmahruaina goal a khung a, South Africa tan Teboho Mokoena chuan penalty aṭangin an siphurh a sut.

Mercedes-Benz Stadium, Atlanta-a inkhelah Czech Republic tan minute rukna lekah, Sadilek-a'n goal hmahruai a khung a, South Africa tlarhnung a nghet lo hle.

Goal a luh hnuah team pahnihte an innawr tawn zak zak a, goal erawh a khung belh lawk thei lo. South Africa-in ball an chang tam zawk a, chance vawi tam nei mah se goal hmaah an hriam tawk lo.

Czech Republic a chak mai dawna a lan laiin South Africa-in penalty an hlawhchhuak hlauh. Minute 81-naah Thapelo Maseko shot chu Pavel Sulc-a'n a kuta a lo dan per avangin Repre-in (Cezch Republic sawina) penalty an chawi a, Mokoena chuan pet goal-in an siphurh a sut a, hun tawp zuiin chak zawk an awm lo.

Ram pahnihte hian match hnih an khelh tawhah point khat ve ve an hmu tawh a, pathumna nih beiseiin an match tawp ber an khel dawn. Mahse group danga pathuma te nen khaikhin an nih dawn avangin an beiseina a chau hle.