European Champion tan thawh a hun

Kumin World Cup champion tura rinkai zinga mi Spain chuan, Pathianni zing dar 9:30-ah Saudi Arabia an hmachhawn dawn. La Roja (Spain sawina) hian point khat chauh an la hmuh avangin champion an tum tak tak a nih chuan, Saudi Arabia lakah an chetsual a thiang tawh lo.

An match hmasa berah Spain hian a vawi khat nan World Cup khel, Cape Verde lakah vawi 23 zet shot nei mah se goal an khung thei lo a, goal awm loin an inhnehtawkpui.

La Roja hian Cape Verde an hmachhawn ṭum khan Lamine Yamal an luhtir hma chu, phur tak leh hmuhnawm thamin an khel chhuak thei lo a, a vawi hnih nana World Cup chawi theih nan kum 18 mi Yamal hi a pawimawh dawn. Luis de la Fuente-a'n bul a ṭan tir tawh a rinawm.

De la Fuente naute zingah Victor Munoz tih loh chuan hliam an nei lo a, Liverpool player thar Munoz hi a lo kir hun tur a la chiang lo. Hetihlai hian Cape Verde laka khel ṭha tawk lo Mikel Oyarzabal leh Gavi leh Ferran Torres te chu bench-ah an ṭhut a rinawm tawh zawk.

Spain hian 2010-a World Cup-an champion hnuah last 16 an la paltlang leh lo a, Euro champion lai hian kuminah an record duhawm lo hi thaichhiat an tum dawn.

Saudi Arabia pawhin hliam an nei lo a, Abdulelah Al Amri kha an match hmasa berah rintlak a nihzia a lantir tawh a, tlar hnungah hmun a la chang chhunzawm ang. An captain Salem Al-Dawsari pawh ram tan vawi 111 inlana goal 27 thun tawh a nih avangin Spain tan ven bik a sual lo ang.

Firas Al Buraikan pawh tlar hma lamah hmun chang chhunzawm leh tura ngaih a ni a, kum 26 mi hian 'Green Falcons' (Saudi Arabia sawina) tana goal 15 a lo thun tawh chu belhchhah leh ngei a tum dawn.