Spurs defender thar Van Hecke

Khawvelin World Cup lam an hawi mup mup laiin, Tottenham Hotspur chuan an squad thuam ṭhat hna an thawk chhunzawm zel a, Netherlands defender Jan Paul van Hecke chu Brighton & Hove Albion aṭangin an la lut leh ta.

Kum 26 mi defender manah hian pound maktaduai 52 an inseng a, a contract rei zawng hi tarlan ni lo mah se, Spurs hian, "Hun rei tak chhung atan," an ti a, kum nga emaw kum ruk emaw chhung atan a nih a rinawm.

Van Hecke hian a contract ang chuan kum khat dang cham turin Brighton-ah hun a la nei a, mahse, Spurs-in an lei chhuak ta - Spurs hian nakinah an hralh a nih chuan, tiin Brighton hian a man an dawn tur bakah share an la hauh cheu bawk!

Dutch defender chuan, "Spurs player ka ni thei hi ka tan chuan chawimawina a ni a, club lian tak ka zawm avangin ka duhthusamte a thleng dik a ni," a ti a, Brighton-a amah lo enkawl tawhtu Roberto de Zerbi kaihhruaina hnuaiah a khel leh dawn tihna a ni.

Spurs hian Dutch player langsar, defender Micky van de Ven leh Xavi Simons te an nei bawk a, Van de Ven nen phei chuan tun World Cup-a Netherlands match hmasa berah khan an inlan - Simons erawh hliam vangin squad-ah a awm lo thung.

Van Hecke chuan, "Head coach nen kan innel sa a, ani nena kan thawk dun thei tur hian min tiphur hle. Micky pawhin he club chanchin hi tam tak min hrilh a, ka phur hle a ni," a ti a, mahse, Van de Ven erawh duhtu a neih nual avangin a chhuak lo ang tih a sawi theih loh.

De Zerbi chuan, "Brighton-ah hun kan lo hman dun tawh avangin ka hrechiang a, kan thawk dun leh thei tur hi ka lawm hle. Player chak tak, fing leh ball keng ngam, huaisen taka khel ṭhin a ni a, ka team rem ka tum danah a khelh dan hi ka duh dan a ni," a ti.

Tottenham sporting director Johan Lange chuan Van Hecke chu rei tak an lo thlithlai tawh thu a sawi bawk. Van Hecke hian Seagulls (Brighton sawina) tan match 131 a khel hman a, season hman zawh taka an league match 38-ah khan vawi 36 ngawt bul a ṭan a ni.