Kane hi England striker ropui ber a ni - Lineker

Mi tam takin England striker ropui bera an ngaih Gary Lineker chuan Harry Kane chu England striker ropui ber a nih thu a sawi a, amah mai ni loin, Manchester United legend Wayne Rooney chungah pawh a dah tihna a ni.

Kane hian tun World Cup-a an match hmasa berah England tan goal hnih a khung a, Three Lions tan World Cup-a goal 10 a khung tlinna chiah a ni - Lineker hian World Cup-ah England tan goal 10 tho a lo khung tawh a, hei hi Kane chuan a nih rual.

Lineker chuan, "World Cup-a goal 10 khung tling thei zingah ka lo lawm a che, mahse, kei ai chuan hun i mamawh rei deuh," tiin a fiam zui - Lineker hian World Cup 1986 leh 1990 kha England tan a khel a, Kane erawhin 2018, 2022 leh 2026 a khel thung.

Gary Lineker chuan, "Harry Kane hi England-in striker kan neih tawh zawng zawnga ropui berah ka ngai a ni," a ti zui - Bayern Munich striker hian ram tan inelna hrang hrangah match 115 khelin, goal 81 a khung tling der tawh.

Barcelona striker hlui Lineker chuan, "Kane-a'n ka record a rawn nih rual hi ka lawm takzet a, ka ngaihdanah chuan game pumpuia a tha thawh dan hi midang aia a chungnunna chu niin ka hria," a ti.

World Cup 2026-ah goal khungtu ropui ho an che ropui hle - Lionel Messi-a'n hattrick a siam a, Kylian Mbappe, Erling Haaland leh Kane ten goal hnih ṭheuh an khung bawk. Hetihlai hian Cristiano Ronaldo erawh goal a la khung ve lo.

England striker ropui dang Alan Shearer chuan, "Kane khan Messi, Mbappe leh Haaland te che ṭha lai kha a hmu vek alawm," a ti a, player dang chet ṭhatna chuan nasa taka a nawr kal thu a sawi.

Manchester United defender Harry Maguire chuan, "Kane hi England player ṭha ber a ni mai lo a, khawvel huap pawha player ṭha ber zinga mi a ni. Amah fak nan hian lutuk a awm thei pawhin ka hre lo - awihawm loh khawpin a ṭha a, khelmual pawnah hruaitu ṭha em em a ni bawk," a ti a, a ṭhianpa a fak ve bawk.

Ram tana goal 81 khung thei Kane hi England tana goal khung hnem ber a ni a, a hnuaiah hian match 120-a goal 53 khungtu Wayne Rooney, match 106-a goal 49 khungtu Sir Bobby Charlton leh match 80-a goal 48 khung thei Gary Lineker te an awm.

Thomas Tuchel-a enkawl England hian World Cup-a an match hmasa berah Croatia chu 4-2 in an hneh a, June 23, Thawhlehni zan dar 1:30-ah Ghana nen match hnihna an khel leh ang.