Thawhlehni zingah Norway vs Senegal

Khelmuala African champion Senegal-in Thawhlehni zing dar 5:30 hian Erling Haaland-a telna Norway an hmachhawn dawn. FIFA World Cup 2026-ah Sadio Mane telna team hian match hmasa berah France an hneh loh avangin Vikings (Norway sawina) lakah point hlawhchhuah ngei a ṭul dawn.

Norway hian Iraq 4-1 in an hneh a, Senegal lakah pawh inrintawkna an ngah ang. Erling Haaland-a'n World Cup khelh hmasak berah goal hnih a khung nghal a, Stale Solbakken hote hian competive match hnuhnung 11-ah goal 50 khungin goal sarih chauh an chhuah. Senegal lakah an result ṭha hi chhunzawm an duh dawn.

Senegal lamin France 3-1 in hneh lo mah se Les Bleus lakah hian first half-ah inkhel an thunun zawk. Goal khungtu Ibrahim Mbaye a rawn che ṭha a, PSG forward hi kum 18 leh ni 143 mi chauh niin African zinga World Cup-a goal khung thei naupang ber a ni.

Pape Thiaw kaihhruai team-ah hian tlarhmaah Sadio Mané, Nicolas Jackson leh Ismaïla Sarr te an awm a, Europe-a tawnhriat nei ṭha vek an ni. Mual laiah Everton midfielder Idrissa Gueye-a'n hmun pawimawh a chang a, goalkeeper-ah pawh Chelsea innghahna Édouard Mendy an kawl bawk.

Norway-in Haaland bakah Alexander Sorloth, Martin Odegaard leh Antonio Nusa te an kawl avangin Senegal captain Kalidou Koulibaly a pawimawh lehzual dawn. FIFA ranking-ah Senegal hi 15-naah awmin Norway hi 31-na a nih phak chauh mah se Solbakken hote hi 'super computer'-in chak tura a rinzawk a ni. Inkhel a hmuhnawm ang.