Remsiami'n India a champion pui

FIH Hockey Women’s Nations Cup-ah Mizo nula Lalremsiami a che ṭha a, India an champion. Nimin khan India hian Auckland-ah inelna thlengtu New Zealand hi 2-0 in an hneh a, Remsiami hi final-ah player of the match-a thlan a ni. India hi FIH Pro League khel turin an tling bawk.

Inelna hi kum 2019 aṭanga khelh ṭan kha a ni a, inelna neih hmasak ber ṭumah hian India hian inelna thlengtu Spain hnehin an champion a, hemi ṭum pawh hian Remsiami hi a tel.

Inelna hnuhnung pahnihah India an tel lo a, inelna thlengtu New Zealand hi champion lai an ni. India hi pool A-ah United States (3-2), Japan (2-1) leh Uruguay (3-2) te nen an awm ho a, hnehna an chang vek. Semifinal-ah India-in Chile 6-0 in an sawp a, final-ah Navneet leh Sunelita te goal hmangin New Zealand an hneh leh bawk.

Mizo nula Remsiami hian Japan an hneh ṭumin chakna goal a khung a, goal dang khung tawh lo mah se player pawimawh bik a ni. Final-a player of the match Remsiami chuan, "Team angin kan khel ṭha a, player tinin kan tih tur ṭheuh kan ti ṭha hle. Pro League khel turin kan tling a, kan phur takzet," a ti. Remsiami bakah hian Lalthantluangi chu squad-ah a awm ve bawk.