Bawngkawn Horns an champion

LESDE MBBA Inter District Basketball Tournament 2026-ah Bawngkawn Horns chuan NKGSA 79-68 a hnehin an champion. Bawngkawnin nomawi an chawi theih nana player pawimawh Rinsangliana chu MVP-a thlan a ni a, final-ah hian point 29 a nei pha hial.

MBBA buatsaih inelna hi LPS Arena-ah neih a ni a, final hi June 19, Zirtawpni zanah khelh a ni. Final-ah team pahnih an inhnehtawk a, first quarter-ah NKGSA-in 21-13 in hma an hruai a, half time-ah pawh 40-29 in hma an la hruai pha.

Third quater zawhah pawh NKGSA hi 57-46 in an la chungnung zawk a, chak turin an dinhmun a ṭha. Mahse, quarter tawp berah Bawgkawn an che ṭha a, minute li bawr vel chauh khelh tur a awm tawh tihin hmahruaitu zawk a ni tawh. Hun a tawp meuh chuan 79-68 in an chak zawk a, a tawp thlenga theihtawp an chhuah rah an seng.

Tun ṭum inelnaah hian team kua an tel a, Aizawl district aṭangin Model Veng BC, Republic Veng VR4, Bawngkawn Horns BC, Lunglei Electric Veng BC, Team Fam BC (Lawngtlai), Model Youth Siaha, NKGSA (Kolasib), Champhai Vengthlang BC leh Mamit Hmar Veng BC te an tel. Bawngkawn hian Model Veng BC an hneh a, final-ah Kolasib club NKGSA lakah hnehna an chang.