Sweden lakah Netherlands tho chhuak

Ronald Koeman-a enkawl Netherlands chuan Inrinni zan khan, an match hmasa bera goal nga khungtu Sweden an hmachhawn a, 5-1 a hnehna changin group F table chung ber an luah nghal.

Netherlands tan Brian Brobbey leh Cody Gakpo ten goal hnih ve ve an khung a, Crysencio Summerville chuan goal khat a khung ve bawk. Sweden tan Anthony Elanga goal khung chu an mualpho zual tur hliahna chauh a ni.

Brobbey a ropui

Koeman-a'n Japan laka khel ṭha tak Summerville aiah Brian Brobbey a luhtir a, a tisual lo. Sunderland forward hian minute ngana lekah Gakpo cross chu hnai tak aṭangin a khung nghal a, Netherlands hma a hruaipui.

Brobbey-a vanneih chhunzawm a, minute 17-naah Denzel Dumfries-a cross chu tlawh goal-in an hmahruaina a belhchhah. Dumfries-a cross hi Sweden left back Gabriel Gudmundsson-a'n a lo khawih pial avangin tumah dem theih an awm bik lo.

Sweden an bet reng bik lo a, Viktor Gyokeres-a chance neih vawi hnih chu Netherlands keeper Bart Verbruggen-a'n ṭha takin a dansak a, Gustaf Lagerbielke-a goal khung chu offside vanga pawm a ni lo bawk. Tunisia laka goal hnih khungtu Yasin Ayari pawhin ṭum hnih lai chance nei mah se, Verbruggen vanneih zan a tawn avangin goal a khung thei lo.

Oranje pawhin goal an khung chhunzawm thei mai bik lo a, Malen leh Gakpo te chuan chance nei leh mah se Sweden keeper Kristoffer Nordfeldt tan hna hautak an siam thei lo a, goal dang lut tawh loin halftime an hmang.

Gakpo ve thung

Seconf half-ah pawh Netherlands bawk an hlauhawm a, Dumfries-a cross chu vengtu nei lo Gakpo-a'n awlsam takin a khung a, goal thumin hma an hruai.

Gakpo pawh goal khatah a lungawi bik lo a, minute sarih hnu lawkah Summerville-a hneh aṭanga a ball hmuh chu Lagerbielke bun nan a hman hnuah, mawi takin an goal lina a khung.

Scoreline timawitu

Sweden tan Anthony Elanga chuan minute 59-naah chiang takin a pet goal a, an si phurh sut ṭhenin beiseina thar a siam. Goal an khung hnuah phur thar viau mah se goal hmaah Sweden-in goal an khung belh thei lo a, Netherlands-in an khung belh thung.

Oranje player ten mawi taka an in pass kual hnuah, Summerville-a'n goal kilah tak khungin a tawp a khar a, hun tawp zuiin harsatna tawk loin Koeman-a naute an chak.

Engtin zel?

Graham Potter-a enkawl Sweden hian Tunisia lakah goal nga khungin bul ṭan mah se, an khung zat chiah an chhuah leh a, an match hnuhnung berah Japan an hneh lo a nih chuan an tan round of 32 lut a harsa tawh ang.

Netherlands erawh Tunisia an hmachhawn leh dawn a, an group-a team nem bera ngaih lakah hian an chak chuan group stage an paltlang dawn a, Tunisia hi an tlak tawh avangin Oranje tan thil harsa tur niin a lang lo.