Japan-in Tunisia an pet tla

An match hmasa ber an chak zawh loh hnuah Japan chuan Pathianni zing khan, si li faiin Tunisia an hneh a, round of 32 lut tura duinhmun ṭha taka an indah bakah,Tunisia hi inelna aṭangin an pet tla tel bawk.

Japan tan minute lina lekah Daichi Kamada chuan hnai tak aṭangin an hmahruaina goal a khung a, minute 31-naah Ayase Ueda chuan box pawn aṭangin an goal hnihna mawi takin a khung bawk.

Second half-ah Japan bawk an chungnung zawk a, Junya Ito chuan keeper chauh a hmachhawn hnuah an goal thumna a khung a, Tunisia tan thawhchhuah a har tawh.

Tunisia manganna belhchhah turin minute 83-naah Ueda chuan, Kaishu Sano cross satliah chu a tauh lut a, an chak nemnghehna goal a ni zui.

Inkhel pumpuiah Samurai Blue an chungnung tluan zak a, Tunisia lam hlauhawmna hmuh tur awm lo khawpin an dangchat thei. Japan hian point li an nei tawh a, Zirtawpnia group match hnuhnung bera Sweden an hmachhawn hunah 'last 32' luh beiseiin an khel ang.

Hetihlai hian Tunisia erawh point an la hmuh loh avangin group F mawng an luah a, an match hnuhnung berah Netherlands hneh pawh ni se Sweden leh Japan an hneh tawh loh avangin beisei tur an nei tawh lo.