Round of 32-ah USA an lut

World Cup thlengtu zinga ram langsar bera chhal ngam USA chuan an ṭha ve tawk tih pholangin, Australia chu 2-0 in an hneh a, match hnih an khelh tawhah hnehna an chan ve ve avangin World Cup round of 32 an inpetkai. Mauricio Pochettino hote hian an elpui Paraguay leh Australia te an hneh avangin an group-ah pakhatna dinhmun an hauh chiang tawh bawk.

USA hian an thiampuipa Christian Pulisic chu hliam vangin an chhawr thei lo a, mahse, an buai phah lo chiang hle - inkhel ṭantir aṭangin US hian Turkey hnehtu Australia hi an nawr mawp mawp a ni ber a, "An chak ang em aw?" tih ai chuan, "Eng tikah nge an khung ang?" tih chu rilrua zawhna lo awm zawk a ni.

Minute 11-naah US hian goal an khung ta nge nge a, Australia defender Cameron Burgess chuan US striker Folarin Balogun-a ball pet chu dan a tumna lamah, an lamah a tilut a, US-in hma takah hma an hruai.

Seattle Stadium-a inkhelah US-in inkhel an thunun zui a, minute 43-naah an khung belh. Sergino Dest-a shot aṭanga ball per chu Alex Freeman chuan a tauh lut a, a tirah offside vangin pawm ni lo mah se, video assistant referee (VAR) hmanga ennawn a nih hnuah pawm a ni.

Goal dang lut loin chawlhlawk hman a ni a, Australia-in US tlarhnung an rum ṭhaih ve meuh lo. Mahse, Turkey laka goal khungtu, rin loh taka bench-a dah Nestory Irankunda luh hnuah Australia tlarhma an nung sawt a, mahse, an harhchhuah a tlai tawh.

Hun tawp thlenga goal dang a luh tawh loh avangin USA an chak a, point ruk an hmuh tawh avangin World Cup-ah round of 32 an lut fel der - Australia tan beisei a la bo lo a, hetihrual hian Turkey hnehtu Paraguay an la hmachhawn dawn avangin inkhel boruak a 'hot' khawp ang.