Turkey-in World Cup an thlah fel ta

Kum 2002 hnua a vawi khat nana World Cup khel, an group awmna thlir a, round of 32 paltlang ngei tura ngaih Turkey chu World Cup aṭangin an tla ta - an hneh ngei tura ngaih Paraguay chu 1-0 in an ngam lo a, match khat khelh tur la nei mah se, beisei tur an nei tawh lo.

Paraguay tan midfielder Matias Galarza chuan minute hnihna lekah goal hmahruai khungin, a team hi hma a hruaipui a, hun tawp thlenga goal dang a luh tawh loh avangin rin loh zawk Paraguay an chak a, Turkey erawh an tla thung.

Goal an chhuah hnu lawk aṭangin Turkey hian inkhel thunun nghal mah se, a pawimawh ber goal an khung thei lo. Vawi 32 zet shot an nei a, heng zinga panga chiah target-ah a kal thung.

Paraguay player pawimawh Miguel Almiron chu first half hun pek belhah hnawhchhuah a ni - Almiron hi Turkey defender Mert Muldur bulah a kuta a ka hup chungin a ṭawng a, hei hi FIFA chuan tun World Cup-ah a khap.

Player ṭhenkhatin an ka hup chungin, chi inthliarna lam hawi ṭawngkam mawi lo an hmang ṭhin a, chumi venna atan chuan he thil hi ruahman a ni. Almiron chu a tuartu hmasa a ni a, mahse, player kim chung pawha ṭha zawk Turkey-in an chhawr chuang lo!

Paraguay goalkeeper Orlando Gill chet ṭhat zan a ni a, Argentine club San Lorenzo keeper hi Turkey tlarhmaten an paltlang thei lo - a tawpah Australia laka vawi 30 zet shot nei chunga tlawm zawk Turkey an tlawm leh ta a, World Cup aṭangin an tla.