Morocco an kal zel

Scotland head coach Steve Clarke chuan Morocco an hmachhawn hma khan, "Football pathiante chu, min duhsak takin, kan lam hawiin lo nui se ka ti ngei mai," a ti a, a beisei ang erawhin thil a thleng ta lo - Morocco lakah 1-0 in an tlawm a, an hmabakah Brazil an awm!

Morocco tan Ismael Saibari chuan minute hnihna lekah inkhela goal awmchhun a khung a, Scottish tlarhnung a nghet tawk lo - minute 90 chhungin goal dang an chhuah tawh lo a, mahse, goal an khung ve miau loh avangin an tlawm.

Scotland hian Morocco hi draw ta se, Haiti an hneh tawh avangin point li an hmu ang a, round of 32 luhna chance sang tak nei tur an ni. Mahse, an tlawm ta miau a, an group-a team ṭha ber Brazil an hmachhawn zui dawn avangin point thum nen World Cup an mangṭha lo ang tih a sawi theih ta loh!

Inrinni zing inkhelah Scotland coach Steve Clarke-a'n Morocco captain Achraf Hakimi hlauhawmna hrechiangin, left back Andy Robertson-a hmaa ding turin defender bawk Kieran Tierney a dah a, Celtic fullback hna chu Hakimi zui a ni tawp.

Mahse, rin aia hmain Scotland-in goal an chhuah a, a buai zo ta a ni ber - an insiamrem hnuah tlarhnung nghet ṭha viau mah se, si phurh an sut theih loh avangin an goal chhuah a pawi vawng vawng a tih loh theih loh.