German midfielder Nmecha a 'luck'

Borussia Dortmund midfielder Felix Nmecha chuan tun nipui hian Signal Iduna Park chhuahsan a hreh lo nia sawi a awm a, Manchester United leh Liverpool chuan Nmecha hi lak luh an duh a, England-ah a kal leh mai hmel hle.

Kum 25 mi Nmecha hi kum 2023-a Wolfsburg aṭanga Dortmund a zawm khan, German football-a midfielder hmabak nei êng zinga mi a ni tawh a, Dortmund leh Germany tan player pawimawh a ni mek.

Nmecha hian March thla lawk khan Dortmund-ah kum li daih tur contract thar ziak mah se, a hma lam hun tur hi chiang taka sawi theih a la ni lo tih German chanchinbute chuan an sawi a, 'release clause' nei lo mah se pound maktaduai 52-a duhtu an awm chuan an chhuahtir hreh lo niin an sawi bawk.

Spanish club lian pahnih Real Madrid leh Barcelona te pawhin Nmecha hi an awt hle a, midfield thuam chak tum Real leh Barca chuan Manchester City academy chhuak Nmecha hi thlithlai ve mek bawk.

Hetihlai hian Nmecha hi Germany tan World Cup khelin a thang mek a, player langsar ber zinga mi a ni mek. Kumin World Cup-a a chet ṭhat avangin Nmecha man hi a pun sawt a rinawm.