Iran-in Belgium an chelh

Football khawvela ram liana chhal ngam Belgium chu Pathianni zan khan, Iran nen goal awm loin an inhnehtawk. Belgium hian group stage paltlang turin beiseina la nei mah se, point hnih chiah an la hmuh avangin an dinhmun a him bik lo.

Napoli forward Romelu Lukaku chuan Belgium bul ṭan mah se beisei a pha lo a, ram tana goal 90 khung tawhtu hi Iran lakah hmuh tur a awm mang lo a, field chhunga hun a hman chhungin danglamna a siam thei lo.

Belgium-in inkhel thunun zawkin chance insiam nghal mah se goal an khung thei lo a, Kevin De Bruyne, Maxim De Cuyper leh Youri Tielemans ten chance nei mah se Iran keeper Alireza Beiranvand an paltlang thei lo. Iran an zam bik lo a, Hossein Kanaanizadegan-a shot chu Thibaut Courtois-a'n ṭha takin a dansak.

Iran-in minute 25-naah Ehsan Hajsafi chuan an freekick hlawhchhuah chu pet loin Mehdi Taremi a pass a, Inter Milan forward hlui hian Courtois ban phak loh chiahin a khung. Mahse VAR hmang ennawn a nih hnuah Taremi hi a offside avangin a goal hi sut leh a ni.

Second half-ah Belgium tan De Cuyper-a'n a chance neih ṭhat ber a hlah a, yard ruk vel lek aṭangin a pet goal thei lo a, Beiranvand-a'n a dansak hman. Belgium buaina tizual turin Nathan Ngoy chuan minute 66-naah, Taremi a pawh thluk avangin red card a hmu a, kim loin an khelh chhunzawm a ngai.

Chak an mamawh ve ve avangin Belgium an bet bik lo a, De Cuyper bawkin goal khung theihna hun ṭha a nei leh a, mahse Beiranvand khelh ṭhat zan a tawng a, goal a khung thei lo. Hun tawp thlenga goal a luh loh avangi team pahnihten point khat an insem.

Belgium hi an chak loh avangin an tla thei dinhmunah an ding a, an match hnuhnung berah New Zealand laka an result-in an hma hun a hril dawn. Red Devils (Belgium sawina) hian kumin World Cup-ah goal khat khung tawh mah se, 'own goal' a nih avangin an ram player tumahin goal an la khung lo.

Iran erawh buaina tam tak kara inkhel ni mah se, World Cup an khelh tawha an match hmasa pahniha tlawm loa an khlehna hmasa ber a ni a, an match hnuhnung berah an dinhmun tichiang turin Egypt an hmachhawn dawn.