Croatia tan chak a ngai

World Cup 2026-a an match hmasa berah Croatia an tlawm nghal a, an ngam loh chu England an ni - naktuk zing dar 4:30-ah Croatia hian Panama an hmachhawn dawn a, knockout stage luh an duh chuan tlawm nawn a thiang tawh lo.

England laka an tlawm ṭumin Croatia hian set-piece aṭangin goal hnih an chhuah a, Croatia coach Zlatko Dalic chuan, "Croatia ka enkawl hnua set piece-a kan defending chhiat ber ṭum a ni," a ti thlawt - kum 2017 aṭang khan Croatia a enkawl tawh!

Dalic hian World Cup ṭan hma khan, "England hi world champion nih an tum avangin defending game kan khel dawn. Mahse, Ghana leh Panama lakah chuan a danglam ang," a ti a, zaninah attacking game an khel dawn tihna a ni.

Chuti a nih chuan England laka 3-4-2-1 hmanga inrem Croatia hian Panama lakah chuan 4-3-3 an hman a rinawm a, Three Lions laka bench-a awm, tawnhriat nei ṭha Andrej Kramaric pawhin bul ṭan tawhin, Petar Musa leh Ivan Perisic te nen an inkawp ang.

Croatia hian naktuk zingah Panama an hneh zo lo leh a nih ngat chuan, round of 32 luhna chance a hniam sawt dawn tih a chiang a, Dalic-a naute tan, an theihna zawng zawng nena beih a ngai tawh ang.