Salah hoin Egypt an chak

Thawhṭanni zing khan 'Egyptian King' tia hriat hlawh Mohamed Salah chuan, New Zealand lakah Egypt chu 3-1 in a chakpui a, World Cup-a an vawi khat chakna a nih avangin Salah bakah Egypt tan zan chhinchhiah tlak a ni.

Egypt hian goal chhuah hmasa mah se second half-ah goal Salah bakah Mostafa Ziko leh Trezeguet te hmangin an chhanglet a, round of 32 lut turin dinhmun ṭha takah an awm.

New Zealand tan Finn Surman chuan minute 15-na lekah goal hmahruai a tauh lut a, All Whites hian an nawr chhunzawm bakah Egypt tan Salah leh Emam Ashour ten chance ṭha an hlah avangin an chak lo leh mai dawnin a lang hman.

Mahse Egypt-in halftime chawlh an hmang ṭha tih a hriat a, an goal bawh a na hle. Minute 58-naah goal an khung ta nge nge a, Mohamed Hany-a cross chu Ziko-a'n kawh zeta tauh lutin an siphurh a sut.

Minute 67-naah an thiampuipa Salah-a'n goal kilah pet lutin an hmahruaina goal a khung a, hun tawp hma hretin Aston Villa player hlui Trezeguet chuan corner aṭang tauh lutin an chak nemnghehna goal a khung.

Kum 34 mi Salah hian ram tan match 118 inlan tawhin goal 68 a khung tling tawh a, kuminah champion tura rinkai zingah tel pha lo mah se a Pharaohs hi a sang thei ang ber thlenpui a tum ang.

Salah hian Egypt hi group G hmahruaitu a nihpui a, June 27, Inrinni zing dar 8:30-ah New Zealand nen group match hnuhnung ber an khel ang.