Real-in Olise an dawr lo

Jose Mourinho enkawlna hnuaia khel tur Real Madrid chuan Bayern Munich forward Michael Olise dawr anga an sawina chu an pha a, club hriatpui loa French forward bia anga an sawi chu a dik tawk loh thu an sawi.

Real chuan thuchhuah siamin, "Media ṭhenkhatin Bayern Munich player Michael Olise dawr anga min sawina chu, thudik lo a ni a, player emaw, a aiawh emaw, amah lam hnaih hrim hrim emaw biak kan nei lo," an ti.

Spanish club chuan, "Real chuan Bayern Munich nen hian rei tak chu, inzah tawn leh inhrethiam tawn takin indawrna a lo kalpui tawh ṭhin a, media lama thuthang lo awm hi club pahnih indawr ṭhin dan nen a inmil lo a ni.

"Club pahnih inkarah player lakluh duh an awm a nih pawhin, club pahnih inkarah indawrna a awm hmasa zel," an ti a, French forward lakluh tuma dawrna engmah an neih loh thu an sawi.

Real Madrid hian tun nipui transfer-ah player an la lut nual tawh. Liverpool-a contract hmang zo hlim centre back Ibrahima Konate chu free transfer-in an la lut a, Manchester City captain kal chhuak Bernardo Silva pawh a thlawna la lutin, Marc Cucurella chu Chelsea aṭangin an lei bawk.

Madrid khaw club nena sawizawm Olise hi World Cup khelin, France tan a feh chhuak mek a, kum 2024-a Bayern a zawm hnuah match 107 khelhsakin, goal 42 a khung a, assist vawi 54 a nei tel.

Season hman zawh takah khan Bayern tan match 52 khelin goal 22 a khung a, assist vawi 31 a nei tel. Kum 2029 thleng contract a la nei a, France tan World Cup nomawi a chawi a nih chuan a hlutna a sang zual sawt ang.