Real-a retire duh Courtois

Belgian goalkeeper Thibaut Courtois chuan a khelh mekna Real Madrid-ah football a chawlhsan hma chu awm a duh thu a sawi a, an ramah football khela kir leh a tum tawh loh thu a sawi chiang.

Kum 34 mi Courtois hian kum 2018-a Chelsea aṭanga Real a zawm hnu khan Madrid-ah hian kum riat a hmang tawh a, vawi 333 inlan tawhin major trophy 12 a chawi tawh a, heng zingah hian La Liga title pathum leh Champions League title pahnih a tel.

Courtois chuan, "Belgium-a khelh leh chungchang hi ka ngaihtuah tawh lo. Ka tan chuan Belgian Pro League kawngkhar chu khar a ni tawh. Genk pawh hian goalkeeper naupang thiam tak tak an ngah a, chuvang chuan ka thiltum ber chu Real Madrid-a ka career hman zawh hi a ni," tiin Real Madrid goalkeeper chuan a sawi.

Tun hnaiah Courtois hi Belgian Pro League-a a club hlui Genk zawm leh tur anga sawi a tam a, mah se Courtois thusawi thlirin Belgium-ah a kir a rinawm tawh loh.

Atletico Madrid tan pawha khel tawh Courtois hi Belgium tan World Cup khelin a feh chhuak mek a, Pathianni zan khan Iran inhnehtawkpui mah se mimal takin Courtois a khel chhe lo.