Chelsea sang zual zel

Antonio Conte enkawl Chelsea ngamtu an awm lo tluang zel. Blues hian Cesc Fabregas-a goal khat hmangin khualmualah Sunderland an hneh - Premier League-ah point ruk zetin hma an hruai fal ta!

Nilaini zan inkhelah Arsenal midfielder hlui Fabregas chuan minute 40-naah goal awmchhun a khung. Blues hian a zawnin league match 10 chhung hnehna an chang ta a, an club chanchinah hetiang hi ṭum thum an tawnna chiah a ni. Premier League club dang zingah hetiang dinhmun luah thei an la awm ve lo.

Juventus manager hlui Conte chuan Premier League-a a season hmasa berah sulhnu ṭha a nei mek. Match hmasa 16 aṭanga vawi 13 hnehna chang thei manager pahnihna a ni a, kum 1988 khan Aston Villa manager John Gregory chuan a match hmasa vawi 16 aṭangin ṭum 13 zet hnehna a lo chang tawh a ni.

Hazard tel loin

Jurgen Klopp-a'n Eden Hazard emaw Diego Costa emaw awm lo ta se Chelsea kaltluang lai a tawp mai theih thu a lo sawi tawh. Liverpool boss ngaih ang ngawt a ni lo, Blues hian Black Cats hmachhawn turin khup na vangin 2015 PFA Player of the Year Hazard an hruai thei lo.

Belgium international aiawh tur hian Willian luhtir a ni a, Nemanja Matic chu hahchawlhtir niin tun season-a a vawi thum nan Fabregas chu inkhel bul ṭantir a ni bawk. Spain international hian Sunderland tlarhnunga player pasarih intlar ṭhup karah goal khung tura hun leh hmun a insiam theih bakah inkhel khaikhawmtu a ni.

Goal khat chauh

Chelsea hian an match hnuhnung pasarihah vawi nga zet chu goal an chhuah lo. Hetihlai hian an match hnuhnung palia a vawi thum nan goal khat chiah an khung, manager Conte-a'n goal khung kawngah hmasawn an ngaih thu a sawi.

Italian manager Conte chuan, "Inkhel thlak thlengna hun ṭha kan nei a nih chuan kan chhawr ṭangkai ngei tur a ni. Chutih rualin goal khat chauh khung a tawk lo a, hun tawp dawnah khan Thibaut Courtois khan min chhanhim a ni, hmasawnna tur kan la nei," tiin a sawi.

Vanduaina

Sunderland hi league mawng-phaha awm an ni a, an mikhual Chelsea erawh hmahruaitu an ni thung. David Moyes-a'n an khingpui hlauhawm zia a hre-chiang a, tlarhnungah player a hnawh khawm. Season kal meka striker hriam bera ngaih Costa an veng tluan thei a, an vanneih ni chu nise hun tawp dawna Patrick van Aanholt hun ṭha neih kha goal ngei chi a ni a, mah se Courtois chet ṭhat ṭum an tawng.

Sunderland boss Moyes chuan, "Chelsea kha keini aia team ṭha zawk an ni tih chu kan hre lawk a, chuti chung chuan ka nauten an khel ṭha hle. Courtois khan kan goal khung tur ropui takin a dang a ni," tiin an phu tawk ang point an hmuh loh thu a sawi.

Nilaini zan Inkhel Results

Middlesbrough 0 - 3 Liverpool

Sunderland 0 - 1 Chelsea

West Ham 1 - 0 Burnley

Crystal Palace 1 - 2 Man United

West Brom 3 - 1 Swansea City

Manchester City 2 - 0 Watford

Stoke City 0 - 0 Southampton

Tottenham Hotspur 3 - 0 Hull City