Chhawnkima chet ṭhat zanah Delhi-in final lut zo lo
Mizo tlangval Lalchhawnkima'n 'Emerging Player of the Match' chawi-mawina dawng chungin Delhi Dynamos chu Kerala Blasters lakah 2-1 in hnehna chanpui mah se inkhel pahnih belh-khawmah team pahnih hi 2-2 in an inhneh-tawk a, penalty-ah Blasters hian 3-0 a hnehna chang zuiin final an lut.
Italian legend Gianluca Zambrotta naute tan Marcelinho-a'n goal hmahruai a khung hnuah Kerala-in Duckens Nazon hmangin an si phurh an sut a, minute 28-na lekah Milan Singh hnawhchhuah zui ni mah se Dynamos-in minute 45-naah Ruben Rocha hmangin an goal hnihna an khung chhunzawm. Hun tawp thlengin goal dang a lut tawh lo a, minute 120 an inkhelh hnuah penalty hmangin chak zawk zawn a ni.
Penalty chu
Josu Currais-a'n Kerala tan penalty hmasa ber a khung hnuah Chelsea winger hlui Florent Malouda chuan Delhi tan penalty a chhuih lut thei lo. Mualneitu Delhi beiseina chhi nung turin Antonio German-a'n Kerala tan penalty a hlah ve leh a, Chennaiyin
aṭanga Delhi pantu Bruno Pelissari-a'n a ṭhiante tan inrintawkna hun siamsakna remchang a neih a khawhral chhunzawm ve bawk.
Blasters tan Kervens Belfort-a'n khungin 2-0 a ni a, Sandip Nandy-a'n Memo pet a dan hnuah Mohammed Rafi-que chuan Blasters tan a pet lut a, South Indian club hi 3-0 in penalty-ah a chak zawkah an ṭang ta a ni.
Kim Kima a lawm
Delhi Dynamos-in final lut zo lo mah se Mizo tlangval Lalchhawnkima'n an thlen china a lawm thu a sawi. Champhai tlangval chuan, "Duhthusamah chuan final luh ngei a, champion kan duh a, mah se Pathianin kan tana ṭha tur zawkah a ruat a nih ka ring," tiin an chak loh a pawm thiam thu Vanglaini palai a hrilh.
Royal Wahingdoh defender hlui chuan sawi chhunzawmin, "Final lut zo lo mah ila mimal takin ka hlawkpui a, kan lo ngaihsan em em ṭhin player leh coach te nen awmhoin thil tam tak ka zir belh phah a ni. A pawimawh berah chuan heng zawng ka tawn theih nana min hruaitu Pathian hi a ni a, engkim hi Amah vang chauha thleng a ni," tiin Vanglaini palai hnenah a sawi a, hlawhtlinna karah pawh Pathian a theihnghilh lo.
Delhi Dynamos-ah hian Kim Kima bakah Lalruatthara leh Malsawmzuala an awm a, Hmunhmelṭha tlangval Ruatthara'n ISL-ah a hmel a lan miah loh laiin AFC Cup final luh vanga squad zawm tlaitu Chatlang rawlthar Sawmtea'n semifinal second leg-ah hmun chang lo mah se inelna pumpuiah match li a khel hman.