Liverpool mawina Adam Lallana
Premier League match hnuhnung pahniha hnehna an chan zawh loh hnuah Liverpool chuan Middlesbrough lakah 3-0 a hnehna changin chak hmel an hmu ve ta - Reds tana mawina chu Adam Lallana a ni a, English midfielder hian goal hnih a khung bakah Divock Origi goal khung tur a siam sak bawk.
Riverside Stadium-a inkhelah Bournemouth leh West Ham laka chesual goalkeeper Loris Karius chu bench-ah dah a ni a, season hmasa thlenga Liverpool first choice Simon Mignolet chuan si ban a nghak - Belgian keeper hian 'first choice' nih a phuzia tilang turin hna erawh a nei meuh lo.
Liverpool tan Lallana-a'n minute 29-na lekah Nathaniel Clyne ball cross chu an hmahruaina goal ni turin a tauh lut a, Boro an tho leh tawh lo. Sadio Mane-a'n hun ṭha vawi tam khawhral mah se Lallana chet ṭhat zan a ni miau a, English midfielder hian Divock Origi tan second half-ah an goal hnihna tur a siam sak. Belgian striker hian minute 68-naah 'Lallana duhsakna' a chhanglet a, English midfielder goal hnihna tur hi a 'khilai' ve thung.
A hming chu Lallana
Kum 2014-ah Adam Lallana-a'n pound maktaduai 25-in Liverpool a zawm a, Southampton captain hlui hian beisei a phak loh avangin sawisel a hlawh hle - tun season-ah erawh Lallana tak tak a inlar a, Premier League player hmuhnawm zing aṭangin English midfielder thaibo a thiang tawh lo.
England tana vawi 29 inlan tawh midfielder hian tun season-ah league match 14 khelin goal ruk a khung a, a ṭhiante thun tur vawi ruk siamsakin Reds goal 12 chu a kut (ke?) chhuak an ni. Lallana hian season hmasa khan league-ah match 30 khelin goal 10-ah chiah a inrawlh!
Klopp-a Liverpool
Premier League champion beisei ngam Liverpool-in an zia tak tak an chhuah ṭan leh ta a, a mimal takin Lallana langsar viau mah se team pumpui khelhdan sawi hmaih theih a ni lo. Inkhel ṭan hmain bench lama Karius dah chu 'topic' tling mah se inkhel a zawh meuh erawh chuan Reds khelhdan mawi chu titi tui ber a ni tawh.
Lallana a thawkrim takzet a, goal a tauh luh hnu lawkah an area lama Adam Forshaw goal shot dang turin a tlan phei hman! Mane-a'n woodwork a pet per hnua Origi goal mawina kha sawi hnawm theih a ni lo. Reds goal hnihna lut tur hian Mane, Georginio Wijnaldum, Lallana leh Origi te an inrawlh vek a, 'team goal' dik tak a ni - Belgian striker hian match nga chhung chu a zawnin goal a khung ta.
Liverpool-in league match 16 an khelhah goal 40 an khung tawh a, league match 16-a goal 40 an khung hnuhnung ber chu 1978-79 kha niin an champion! Liverpool tana lawmna tur dang chu an tlarhnung a ni. Reds tlarhnung pherh ve tak ṭhin kha Boro hmaah an khawng tlat a, Ragnar Klavan leh Dejan Lovren vangin Mignolet tan hnathawh tur a vang hle.
Klopp-a thukhawchang
Liverpool manager Jurgen Klopp chuan, "First half-ah khan bul kan ṭan ṭha tawk lo a, kan khelh danah khan kei ngei pawh ka buai hman. Second half-ah erawh kan insiamṭha a, goal tam zawk khung thei kan ni," a ti.
Klopp chuan Lallana fak nghalin, "Goal a khung loh lai pawhin Adam Lallana hi chu a hmasawnna hmuh tur a awm reng a ni. Kum khat liam ta velah khan ka office-ah kan ṭhu dun a, a khelh dana ka hlim em em laiin ani chuan 'goal ka khung thei lo' tiin a buaina min hrilh. Kei chuan 'goal khung turin a hmun dik takah i awm ngai hleinem' tiin ka hrilh a, zaninah a hunah tak, a hmunah tak awmin goal hnih a khung ta a, a ropui thlawt a ni," tiin a sawi.