Manchester khaw club an chak
Pep Guardiola nauten Chelsea leh Leicester City an ngam loh hnuah chak ni hmel an hmu ve leh ta. Manchester City hian Pablo Zabaleta leh David Silva goal hmangin Watford 2-0 in an hneh.
Nilaini zan inkhel dangah Manchester United tan Paul Pogba leh Zlatan Ibrahimovic ten goal khungin Crystal Palace 2-1 in an hneh hram. Jose Mourinho naute hian point 27 hmuin league table-ah parukna an ni a, an chunga awm Spurs an phak lohna chu point thum a ni.
City a mawi leh ta...
Barcelona manager hlui Guardiola-a'n City a enkawltirh khan duhthusama ṭhain bul a ṭan. Inelna hrang hranga an match hmasa 10-ah hnehna an chang, heng zingah hian league match ruk telin point liin hma an hruai hman.
Mahse, beisei angin thil a kal vek lo. City hian an match hnuhnung 15 aṭangin vawi li chiah hnehna an chang. Etihad Stadium-a hnehna an chan hnuhnun ber chu September 17 a Bournemouth 4-0 a an sawp daih tawh kha a ni.
Watford lakah City hian an ze tak tak an chhuah leh ta a, ball possession 64% nei chungin goal khungna hun
ṭha vawi 13 zet an insiam thei. Defender Zabaleta hian Belgian midfielder Kevin de Bruyne-a cross chu tawih zetin a khung a, Spanish midfielder Silva chuan a club tana league match 200 a khelhnaah hun tawp hmain chak nemnghehna goal a khung bawk.
City hi point thum an hmuh avangin an lawm a, chutihrualin an midfielder Ilkay Gundogan a inhliam avangin an lawm a kim lo. Borussia Dortmund midfielder hlui hi minute 44-naah khup na vangin lakchhuah a ngai a, City-in Germany midfielder hi a thiamna phu tawk aia tlawma an lak theih chhan pawh inhliam vanga buaina a neih ṭhin vang a ni.
Guardiola chuan Borussia Dortmund aṭanga a lakluh Gundogan chungchang sawiiin, "A chawlh chen tur sawi chian theih a la ni lo, hun rei tak chhung a chawl dawn tih erawh a hriat theih," a ti. Inhliam chunga June thlaa an lakluh Gundogan hian City tan match 16 khel tawhin goal nga a khung tawh.
Hei le Pogba!
Hun tawp nan minute hnih chiah a awm tawh tihah Zlatan Ibra-himovic-a'n chakna goal a khung - a siamsaktu chu Paul Pogba a ni. Khawvela player manto ber Pogba hian an goal hma-hruai a khung bawk a, player langsar pahnih hi tunlai Man-chester United chakna hnar an ni.
Premier League tlarhnung phui lo ber pawl ni mek Crystal Palace hian tun season-ah goal 31 an chhuah tawh a, anni aia chhuah hnem chu Hull City (35) leh Swansea (34) te chiah an ni. United-in beisei angin goal an nei mai bik lo, chawlhlawk hma chiahin Ibra chuan a awma ball la thlain Pogba tan a siamsak a, French midfielder hian harsatna nei loin goal hmahruai a khung.
Palace tan James McArthur-a'n minute 66-naah an si phurh a sut a, point an insem ngei dawn niin a lang. Tharum ngah Pogba-a'n a thahrui leh theihna hmangin khelmual chhungah ro a rel a, hun tawp dawnah a manto chhan a ti lang.
France international hian chak taka ball a luh pui hnuah Palace defender pathum karah ball lir lutin Ibra tan a siamsak. Goal maksak leh dangdai khung ṭhang Swede striker hian angle zim zet aṭangin chakna goal a khung.
United manager Mourinho chuan, "Team ṭha ber kan ni! Palace khan tlem chuan min bei let ve ngei a, mahse engmah tham a ni lo. Pogba leh Zlatan te khan an hna an tlin hle a, an pet goal a ni satliah lo a, point thum an hlawh chhuak a ni," tiin a naute pahnih a fak. Pogba hian an match hnuhnung zawka West Ham an hneh ṭumin goal awmchhun khungtu Ibra goal khung tur a lo siamsak tawh bawk.