FIFA Club World Cup Real Madrid-in final an lut

Nimin tlai khan Real Madrid chuan Club America chu 2-0 a hnehin FIFA Club World Cup final an lut. Real tan hian Karim Benzema leh Cristiano Ronaldo ten goal khat ve ve an khung. Final hi Pathiannia khelh tur niin Spanish club hian inelna thlengtu Japanese club Kashima Antlers an hmachhawn ang.

International Stadium Yoko-hama-a inkhelah Zinedine Zidane-a'n Sergio Ramos a khelh-tir lo. Zidane chuan a captain hi Japan pana an zinna lamah harsatna tenau a neih vanga khel lo a nih thu a sawi.

Real Madrid hian an ngai-pawimawh tih a lanna chu tlarhma lama an player ṭha rual Cristiano Ronaldo, Luka Modric, Toni Kroos leh Benzema ten inkhel bul an ṭan vek. Khawvela player man to pahnihna Gareth Bale erawh hliam vangin a inkhel thei lo.

Real-in inkhel an thunun a, France international Benzema goal khung hmasa zawk chu offside vangin pawm a ni lo. Goal awm loa chawlhlawk an hmang dawna a lan laiin Kroos a rawn inlar a, Germany international hian Benzema tan duhthusama
ṭhain through ball a pe a, a goal hmasa pawm a nih loh hnu minute 45-naah Benzema hian sawisel boin goal a khung.

North America khawmualpui champion Club America-in goal khung tumin thapui thawh ve mah se Real Madrid tlarhnung an su nghing zo lo a, hun tawp hma chiahin Ronaldo chuan khawvela Ballon d'Or 2016 dawng theih a nih zai lantir nan an goal hnihna leh chak nemnghehna goal a khung leh. Ronaldo goal khung hi Kroos thlaktu James Rodriguez siamsak a ni ve thung.

Inkhelh ṭan hmain Zidane chuan, "Real Madrid chu club dang nen kan inang lo, a chhan chu keini hi chu inkhelh zawng zawnga hnehna chang tura beisei kan ni a, chuvangin he club tana khelte chuan huaisenna leh tihtakzetna an neih a ngai," tiin a sawi. Manager-in a sawi lawk ang ngeiin Real player-te hian hnehna chan phu khawpin an khel ṭha.

FIFA Club World Cup hi kum 2000 aṭanga khelh ṭan kha a ni a, vawi thum champion tawh Barcelona chu champion lai leh record nei ṭha ber an ni. Catalan club hi season hmasa khan Champions League-ah an champion loh avangin kuminah an inlan lo thung.

Kuminah hian team pasarih - Real Madrid, Atletico Nacional, Jeonbuk Hyundai Motors, Mamelodi Sundowns, America, Auckland City leh Kashima Antlers te an inlan.