Roma ngaihthah theih an ni lo - Buffon

Juventus goalkeeper Gianluigi Buffon chuan an elpui AS Roma chu Serie A nomawi an kawl lai rawn chhuhsak mai thei tur khawpa ṭha leh hlauhawm an nih thu a sawi.

Juve hian tun hnai kum nga chhung chu Italy league-ah hian ro an rel chiang hle a, anmahni hnaih leh elphak an hmu lo. Kuminah erawh beisei angin an kaltluang reng bik lo, match 15 an khelh tawh aṭanga point 39 hmuin hmahruaitu ni mah se Roma nena an inthlauhna chu point li chiah a ni.

Italy international Buffon chuan, "Roma leh Napoli hi Juventus tih lohah chuan champion thei team an ni. Anni pahnih hian hma an sawn reng a, nomawi duhin an tuihal bawk. Kan inthlahdah zeuh a nih chuan remchangah an hmang nghal dawn a, chuvangin kan fimkhur a ṭul hle," tiin a sawi.