China-ah Oscar a pem hnai

Tun hnaia Chinese Super League club ṭha Shanghai SIPG pan tur anga an sawi Chelsea midfielder Oscar chuan China-a pem turin tih tur ṭul 90% chu tih zawh a nih tawh thu a sawi.

English media-te chuan Chinese club hian Brazilian midfielder la tur hian pound maktaduai 50.52 an theh chhuak a, Chelsea hian an pawm tawh niin an tarlang. Shanghai SIPG coach hi Chelsea manager hlui Andre Villas-Boas a ni.

Brazilian television channel lar SporTV chuan Oscarhi an kawm nia tarlangin Brazil international chuan, "Tunah hian 90% hna thawh zawh a ni tawh a, tunah chuan tih tur pawimawh tlemte chauh a awm tawh a ni," a ti.

Kum 2012-a Internacional aṭanga Chelsea pantu Oscar hi Jose Mourinho enkawlna hnuaiah player pawimawh pawl ni ṭhinin 2014-15 a Premier League nomawi an chawi ṭum phei chuan player thawhhlawk pawl tak a ni a, coach thar Antonio Conte hnuaiah erawh hmun a chang phak meuh lo.

Tun season Premier League match hmasa pangaah inkhel bul ṭan vek mah se Italian manager-in 3-4-3 formation a hman hnuah hmun pawimawh a chang phak meuh lo a, September hnuah league match liah chiah la inlanin substitute bench aṭang vekin a tlan lut.

Chinese Super League hi a zawm a nih chuan Chinese football chanchina an player manto ber a ni dawn tihna a ni a, tun dinhmuna player manto ber chu pound maktaduai 46.3 man Hulk niin Brazilian forward leitu hi tuna Oscar rimtu Shanghai SIPG tho an ni.

Hetihlai hian China news agency lar Xinhua chuan Chinese Super Lea-gue-a sum tam dan ngaih-tuahin Cristiano Ronaldo leh Lionel Messi te pawh an career tawpah China lamah an kal an rin thu an lo tarlang ve mek bawk.