Djokovic-a'n coach dang a zawng lo?

Novak Djokovic leh a coach Boris Becker te an inṭhen hnuah world number 2 hian coach thar a zawng lem lo niin khawthlang thuthar thehdarhtute chuan an tarlang.

Serbian thiampuipa leh Becker te hi kum thum chhung an thawhdun hnuah kar hmasa lawk khan an inṭhen. An thawhdun chhung hian Djokovic hian Grand Slam nomawi vawi ruk a chawi hman. Kumin kumtir lamah Australian leh French Open nomawi chawi mah se season chawhnu lamah beisei a phak lo a, world number 1 nihna pawh Andy Murray lakah a chan.

Kum 29-a upa Djokovic hian Davis Cup lama a teammate Nenad Zimonjic chu coach atan a ruai dawn nia sawi a ni a, mahse hei chu thuthang satliah mai a ni.

Grand Slam vawi 12 champion tawh Djokovic chuan, "Kum tharah tha tharin beiseina thar nen season bul kan ṭan ang, tun dinhmunah chuan coaching team zingah insiksawi tumna a awm tawh rih lo. Doha-ah kan inhmu vek dawn nia..." tiin social media hman lar Facebook-ah a tarlang.