MPL6 khel tur team pariat Vawiinah a chiang dawn

Ramhlun North FC leh New Serchhip FC ten vawiin tlai dar 1:00 hian Lammualah Mizoram Premier League Playoff second leg an khel dawn a, inkhelh zawhah MPL6 khel tur a hriat kim theih ang. Season thara Mizoram football inelna sang ber khelh theihna ticket nei tawhte chu Bethlehem Vengthlang FC, Chanmari FC, Aizawl FC, Chanmari West FC, Chhinga Veng FC, Dinthar FC leh Mizoram Police te an ni.

Lalruatliana Sailo hote first leg-ah 6-1 a an chak tawh avangin New Serchhip FC tan thawhngaihna a awm tawh lo niin a lang a, amaherawhchu MPL danah second leg khelh a ṭul miau avangin Serchhip khaw club-in an hmabak hna hautak chu huaisen taka an zawh a ṭul dawn a ni.

MPL4 Playoff-ah goal 11 lutin goal luh tam ber a la ni a, MPL5 Playoff-ah record thar a awm ngei a rinawm. Chutihrualin eng result pawh thleng se New Serchhip tan hming hliauna emaw mualphona a awm lo. Serchhip khaw club hian Aizawl DFA hnuaia club ṭha Venghlui FC an hneh a, MPL Playoff khel tura inpettling hrim hrim hi hlawhtlinna a ni.

New Serchhip FC hi Serchhip district aṭanga MPL Playoff khel hmasa ber an ni a, Serchhip khawchhung inelna pathuma champion thei an ni bawk.