MPL5 final kan nghak chhuak ta Chanmari Vs Bethlehem Vengthlang
Zanin dar 7:00 hian Chanmari leh Bethlehem Vengthlang ten Mizoram Premier League Season 5 final an khel dawn. Lammualah Chanmari leh Bethlehem Vengthlang mipui bakah tualchhung football ngainatu ṭhahnem tak an pungkhawm ang.
Minute 90 leh tlem
Final hi minute 90 chhunga chak zawk an awm lo a nih chuan extra time (minute 15+15) pek belh tur a ni. An la inhnehtawk a nih chuan penalty shootout hmangin chak zawk zawn a ni ang.
Chanmari FC ṭantute K. Kawla Stand leh S. Malsawmtluanga Stand-ah an ṭhu dawn a, Bethlehem Vengthlang FC ṭantute tan Zohminga Zote leh Zomuanthanga Stand zuah sak an ni bawk. Tlang lamah neutral supporter an ṭhu dawn a, Lammual a eng dawn nge a pawl dawn tih a chiang vat dawn.
Inkhel en man hi Rs 100 a ni a, football en tur a awm bakah zaithiam lar Lilzo-a'n zaiin mipui a awi dawn avangin inkhel entu tan kal hma a finthlak - dar 6:50 aṭangin pre-match show a inṭan ang.
Parking a ṭhat tawk loh bawk avangin ṭhutna baka lirthei dahna ṭha chang tur tan kal hma a ngai lehzual ang.
BVT an inpeih
Bethlehem VT coach Lalbiaksanga Colney chuan, "Champhaiah kan kim lo a, bench-a ṭhu tur pawh kan awm lo. Inkhel bul ṭantu zingah pawh nachhawkna ei chunga khelte an ni hlawm a, chuvangin kha inkhel kha chuan team pahnih inkar a sawifiah ṭha ka ti lo. Kan intawn hnuhnun ber kha a suttu zawk an ni a, kan intluk tawk viauin ka hria," tiin team ṭha zawk an awm loh thu a sawi.
BVT hian player inhliam an nei lo a, rinkai lo zawk anga sawi an ni chungin final-a talbuai lo tur tawnhriat nei ṭha player an ngah avangin Chanmari nena an inkar hi a zim tawh hleah a ngaih theih.
BS-a hote tan player thar Zothanpuia chu tlarhnung innghahna a ni a, Bethlehem Veng tlangval Thangpuia hian MPL2-a a lo champion pui tawh Chanmari FC a hmachhawn leh dawn. Mak angreng tak chu Chanmari FC-in Thangpuia awm loh hnuah nomawi an chawi tawh lo.
BS-a chuan, "Thangpuia kan lalut hi kan lawm a, kan team work ṭha sa a rawn siam ṭhat belh a ni. Kan team hi mimalah kan innghat lo a, player tin hi an ṭangkai vek a, Chanmari hneh tur chuan thawhhona ṭha a pawimawh ang. Nomawi chawi kan duh avangin kan theihna zawng zawng nen kan khel ang," tiin Vanglaini palai a hrilh.
BVT boss hian Chanmari FC in-nghahna Malsawmfela leh Ivorian forward Leonce Dodoz te chu mimal taka an ven loh tur thu a sawi bawk.
Team ṭha Chanmari
Chanmari FC hi tun season ṭan tirh aṭanga team ṭha ber zinga ngaih an ni a, champion tura rinkai an ni sa hrim hrim. Tualchhung player ṭha fawmkhawm mah se I Day Football leh MFA Super Cup-ah an champion zo lo.
MPL2 an champion hnua nomawi chawi tawh lo Chanmari FC-in champion ngei an duh tawh. Tun season-ah an beisei ang result an neih loh avangin Ivorian forward Leonce Dodoz leh Nigerian defender Ugochukwu Godswill an lalut a, MPL inelna atana foreign player an lak vawi khatna a ni.
Ivorian forward Dodoz awm hnuah Chanmari goal nawr a na sawt a, semifinal-a I League club Aizawl FC 6-2 zeta an sawp theihna kawngah pawh foreign player-te an pawimawh hle.
Chanmari FC manager Mawitea chuan, "Chanmari hi nomawi duhin kan tui a hal a, champion ngei kan duh. A zawna vawi thum final-a kan chak loh chuan kan rilru a na khawp ang," tiin an club tana chak a pawimawh bikna a sawi lang.
Chanmari manager chuan, "Chanmari mipui an phur a, flag leh ṭul dang siamin an hnatlang reng a, entu mipui pawh an ṭhahnem ang. Dam kim vekin khel thei i la chuan team ṭha zawk kan ni a, kan ṭhat theih dan berin kan khel thei ang em tih erawh ka chiang lo," tiin Vanglaini palai a hrilh.
Chanmari manager hian an player inhliam hming sawi lang lo mah se a ṭawngkam aṭangin kim takin final an hmachhawn thei dawn lo niin a lang.
MPL Final programme hi dar 7;00-a ṭan tur ni mah se dar 6:50 aṭangin pre match show-ah Lilzo a che ṭan ang.
Ngaihnawm -
* Bethlehem Vengthlang FC hi MPL5 league round-ah pahnihna aia hniamah an lo.
* MPL-a final awm hnuah league round-a hmahruaitu an la champion ziah. BVT hian point 27 hmuin hmahruaitu an ni a, Chanmari FC-in point khatin an pha lo.
* BVT coach Lalbiaksanga Colney-in MPL club a enkawl hmasak berah final a thlenpui nghal.
* MPL5 final-ah MPL best defender vawi hnih ni tawh BVT defender Zothanpuia'n a club hlui Chanmari FC a hmachhawn dawn.
* Chanmari FC-in final an la lut vek a, zanina an chak loh erawh chuan final-ah a a zawna vawi thum an chak lohna chiah a ni ang.
* Chanmari defender C. Lalrosanga'n MPL hmasa berah Dinthar FC a champion pui a, hemi hnu hian Chanmari tan khelin MPL final-ah a la inlan kim vek.
* Kolasib tlangval Williama Lalnunfela'n MPL2-ah Chanmari FC a champion pui hnuin MPL3 leh MPL4-ah Aizawl FC a champion pui leh bawk. MPL5-ah Chanmari FC an champion chuan Thakthing tlangval Thomas Lalengkima'n MPL nomawi a zawnin vawi thum a chawi ang.
* Chanmari leh BVT ten MPL5-ah player 25 ve ve an chhawr tawh.
* Chanmari FC-in goal 30 an khung tawh a, goal 15 an chhuah.
* BVT-in goal 17 an khung a, goal 13 chiah an chhuah.
Team Dinhmun
Position Club Lawmman
Champion - Rs 5,00,000
Runner Up - Rs 3,00,000
3rd Place Aizawl FC Rs 2,00,000
4th Place Chanmari West Rs 1,50,000
5th Place Chhinga Veng Rs 1,25,000
6th Place Dinthar FC Rs 1,00,000
7th Place Ramhlun North Rs 75,000
8th Place Zo United Rs 50,000
Fairplay - Rs 20,000
Goal hnih aia tam khungte
Player Club Goals
Malsawmfela Chanmari FC 11
Laldampuia Chanmari West 11
Michael Lalremruata Dinthar FC 8
Lalrammuanpuia (Apuia) Bethlehem VT 6
Vanlalbiaa Chhangte Chanmari FC 4
Lalkhawpuimawia Chhinga Veng 4
R. Laldanmawia Chanmari West 4
Bright Middleton Mends Aizawl FC 4
Lalruatfela Zote Chanmari FC 3
PC Zosanga Bethlehem VT 3
Zosangliana Sailo (Chhaia) Ramhlun North 3
Lalramchullova Aizawl FC 3
Lalruatpuia Dinthar FC 3
Vanlallawma Chhinga Veng 3
Lalnunsanga (Tale-a) Zo United 3
Lalnunmawia Bethlehem VT 3
MS Dawngliana Chhinga Veng 3
Mimal chawimawina
MPL Board-in mimal lawmman dawng thei tur player a tar chhuak tawh a, zanin final khelh zawhah result puanna leh lawmman semna neih a ni ang.
Best player, top scorer leh position tina player ṭha ber hian Rs 5,000 bakah Gionee aṭangin thilpek an dawng ang.
BEST GOALKEEPER
1 Lalruatpuia Chanmari West
2 Liansangpuia Ramhlun North
3 Malsawmdawngzela Bethlehem VT
4 MS Dawngliana Chanmari FC
5 Zothanmawia Aizawl FC
BEST DEFENDER
1 Emma Chigozie Chhinga Veng
2 H. Lalhlimpuia Bethlehem VT
3 Lalramchullova Aizawl FC
4 Lalrinchhana Tochhawng Chanmari FC
5 Vanlalzuia Hnamte Chanmari West
BEST MIDFIELDER
1 K. Lalnunzama Chanmari West
2 Lalrinchhana Chanmari FC
3 Lalruatfela Zote Chanmari FC
4 Zosangkima Bethlehem VT
5 Zosangliana Ramhlun North
BEST FORWARD
1 Laldampuia Chanmari West
2 Lalrammuanpuia (Apuia) Bethlehem VT
3 Malsawmfela Chanmari FC
4 Michael Lalremruata Dinthar FC
5 R. Laldanmawia Chanmari West
Bethlehem Vengthlang arsi a êng dawn em?
Mizoram Premier League-ah Bethlehem Vengthlang FC-in MPL5 final-a an hma-chhawn tur Chanmari FC hi an la hneh ngai lo. Club pahnih hi vawi riat an inhmachhawn tawh a, Chanmari FC hi vawi li chakin vawi li dangah an inhnehtawk.
MPL3 aṭangin BVT-in Mizoram football inelna sang ber an khel ṭan a, Chanmari FC-in vawi hnih an hneh. MPL4-ah BVT-in Chanmari FC assistant coach Lalsangzuala Hmar la lutin champion tumin squad an in din a, league round-ah BVT leh Chanmari hi vawi hnih an inhnehtawk. Semifinal-ah intawng lehin first leg-ah chungnung zawk an awm lo a, second leg-ah R. Laldanmawia goal hmangin Chanmari FC an chak hram.
MPL5-ah Chanmari FC-in an coach Sanga an la let a, BVT-in MPL-a tawnhriat la nei lo Lalbiaksanga Colney an lalut thung. Champhaiah Sanga'n a club hlui BVT lakah zahngaihna lantir loin 4-1 in an sawp. An vawi hnih intawnnaah erawh Chanmari an him hram a, hun tam zawk si phur zawkah ṭang mah se minute 90-naah Malsawmfela hmangin an sut hram.
BVT-in an club history-ah Chanmari FC an la hneh ngai lo a, amaherawhchu tun season hun tam zawkah BS-a hote Chanmari chungah an awm. MPL-ah zanin hi Bethlehem Vengthlang arsi ên hun a ni thei a, 'entawn tlak loh Chanmari mipui' veng dang zawngin an awh rawn hun a ni leh thei bawk.