India basketball team manager-ah Mizo

Basketball Federation of India (BFI) chuan FIBA World Cup 2027 Asian Qualifiers (Window 3)-ah Lebanon nen an inhmachhawn turah Mizoram Basketball Association (MBBA) president R. Lalnunpuia chu team manager turin an ruat.

Durtlang Leitan pa Puia chuan, "Lebanon hi kan la hneh ngai lo a, ka manager ṭumah te hian hneh thei ila a lawmawm khawp ang. Tun ṭum India team-ah hian Mizo kan tel lo a, chutihrualin international level-ah chuan kan theihna hi la sang lo. Lebanon lakah erawh vanneih theih kan inbeisei e," tiin Vanglaini a hrilh.

FIBA World Cup 2027 qualifying hi June 29, Thawhṭanni hian ṭan a ni dawn a, BFI hian Puia hi kalna, a thlenna bakah ei leh in senso zawng zawng an tumsak vek dawn.

June 25, Ningani hian Puia hi India senior team-in training camp an neihna Bangalore a thleng ang a, June 27, Inrinni hian Lebanon panin an chhuak ang.

Puia hi Mizo zingah India team manager ni thei pahnihna a ni a, kum 2016 khan Republic Veng pa Lalrinfela (Pepe-a) chuan Indonesia-ah India under 16 hmeichhe team manager a lo ni tawh a ni.