Oxford leh Ramsey inbia

Aaron Ramsey chu football a chawlhsan aṭanga thla hnih hnuah, club enkawl tura sawmna a nei hmu nghal. League One club Oxford United chuan an manager thar ni turin an duh.

Oxford hian kar hmasa khan an manager January-a an lak, Matt Bloomfield chuan a relegate pui hnuah an ban a, Arsenal midfielder hlui Ramsey hi a thlak nana an duh ber a ni.

Welsh FA pawhin an midfielder hlui hi an lo hmu tai a, an coach ni lai Craig Bellamy-a'n Burnley a pan dawn nia sawi a awm avangin Ramsey hi Bellamy thlak tura an duh zingah a tel.

Mahse, Ramsey erawhin club lamah career siam chhoh a thlang zawk a, kum 35-a mi Ramsey hian a club hlui Cardiff City-ah pawh hun rei lote chhung chu a lo enkawl tawh.

Ramsey hian Oxford a pan a nih chuan a teammate hlui Chris Gunter chu assistant manager ni turin a hruai tel rin a ni a, thu chiang engmah la awm lo mah se Ramsey hian Oxford a pan hmel hle.