Chak mamawh Czech hmaah Mexico

FIFA World Cup round of 32 lut tura chak mamawh Czech Republic chuan naktuk zing dar 6:30-ah group A hmahruaitu leh tling hmasa ber Mexico an hmachhawn dawn a, Czech Republic hian Mexico an hneh lo a nih chuan tlin theih dan la nei mah se, an dinhmuna ṭhat dawn loh avangin chak an mamawh.

Kumin World Cup-ah Czech Republic-in beisei an pha lo a, an match hmasa berah goal khung hmasa mah se South Korea an inlehthaltir a, team nem bera ngaih South Africa lakah an goal neih hum zo loin, an inhnehtawkpui bawk.

Hetihlai Mexico erawh kum dang angin player langsar ngah lo mah se an khel ṭha a, mahni ram leilunga khel an nih avangin inringtawk takin an khel thei a, match hnih chak zawnin round of 32 an lut tawh.

El Tri hi an tlin chian tawh avangin player ṭhenkhat an hahdamtir a rinawm a, South Africa laka hnawhchhuah Cesar Montes chuan hremna a hman zawh tawh avangin a inlan leh thei tawh.

Mexico tan veteran keeper Guillermo Ochoa a lut dawn em? tih chu mipuiin an ngaihven a, group-ah pakhatna an nih avangin Raul Rangel aiah Ochoa a lut a nih pawhin a mak lo ang. Kum 40 mi keeper mi a inlan a nih chuan World Cup vawi ruk a khel dawn a, Cristiano Ronaldo leh Lionel Messi te huangah a awm dawn.

Czech Republic tan erawh thih thaa an ṭan a ngai tawh dawn a, Bayer Leverkusen striker Patrick Schick bakah West Ham United tana khel dun ṭhin Tomas Soucek leh Vladimir Coufal te an pawimawh dawn.