Rashford duhtu zingah Spurs an tel

Tun nipui transfer-a sawi hlawh zinga mi Marcus Rashford duhtu zingah Tottenham Hotspur an lo lang ve a, indinthar tuma hmala mek Spurs hian pound maktaduai 40-in Rashford hi lak theih an inbeisei.

Kum 28 mi Rashford hi season liam ta khan loan-in Barcelona tan a khel a, inelna hrang hrangah goal 14 khungin a khel chhe hran lo. Catalan club hian Rashford lak ngheh theih dan nei mah se, Newcastle United aṭangin Anthony Gordon an la ta zawk a, Manchester United-ah Rashford a kir.

English forward hian Old Trafford-ah kum hnih contract la nei mah se, club-in chhawr zui an tum tawh loh avangin hralh an tum mek. Premier League club lian zingah United elpui Manchester City leh Liverpool pawhin Rashford an duh a, mahse Red Devils lamin an hmelma lakah hralh an tum lo.

Rashford hian season a hman ṭhat avangin Thomas Tuchel-a'n England tana inlan turin a ko a, Spurs hi Roberto de Zerbi hnuaiah an indinthar mek. Tun nipuiah Brighton & Hove Albion defender Jan Paul van Hecke chu pound maktaduai 52 in la lut tawh a, Bournemouth defender Marcos Senesi leh Liverpool left back Andy Robertson te chu free transfer-in an lo la tawh a ni.