Schlotterbeck tan World Cup a tawp

Germany defender Nico Schlotterbeck chu a ke rek a tihnat avangin a chawlh rih a ngai dawn a, a hliam hi endik a hnuah thla hnih tal a chawlh a ngaih dawn avangin World Cup-ah a inlan chhunzawm thei dawn lo.

Kum 26 mi Schlotterbeck hi Ivory Coast nen an inhmachhawn ṭum khan, second half an ṭan deuh chiah tihin Amad Diallo a chuhna lamah a ke a nghat sual a, a inkhelh chhunzawm theih loh avangin Antonio Rudiger-a'n a thlak.

Die Mannschaft coach Julian Nagelsmann chuan, "Schlotterbeck awm lo tur hi kan tan channa nasa tak a ni a, a tan World Cup ṭha tak a ni dawna a lan laiin a chawlh mai a ngai hi pawi kan ti hle. Mahse amah hi a êng zawnga thlir ṭhin a nih avangin a aia ṭha zawka rawn kir leh kan beisei," a ti.

Germany hian centre back-a khel turin Jonathan Tah, Rudiger, Waldemar Anton leh Malick Thiaw te an la nei a, Rudiger hian Schlotterbeck-a hmun ruak a hnawh khah a rinawm. Die Mannschaft hi group E hmahruaitu ni chungin round of 32 an lut tawh a, June 25, zan dar 1:30-ah group match hnuhnung ber atan Ecuador nen an inhmachhawn dawn.